Мирзиёев Пекин Олимпиадаси очилишида иштирок этади

Ўзбекистон Президенти Шавкат Мирзиёев Хитой Раиси Си Цзиньпин таклифига биноан, жорий йилнинг 4 февраль куни Пекинда бўлиб ўтадиган 2022 йилги қишки Олимпия ўйинларининг очилиш маросимида иштирок этади. Бу ҳақда “Дунё” АА хабар берди.

Маълумотларга кўра, Хитой раҳбари 4-6 февраль кунлари Пекинда 2022 йилги қишки Олимпия ўйинларининг очилиш маросимида иштирок этади, шунингдек, хорижий давлатлар етакчилари, ҳукумат раҳбарлари, қироллик оилалари аъзолари ва халқаро ташкилотлар раҳбарлари шарафига қабул маросими ўтказади.

Меҳмонлар орасида Ўзбекистондан ташқари, Россия, Сингапур, Қозоғистон, Қирғизистон, Тожикистон, Туркманистон, Миср, Польша, Аргентина раҳбарлари, Камбоджа қироли, Қатар амири, Саудия Арабистони валиаҳд шаҳзодаси, бошқа қатор давлатлар етакчилари, Халқаро олимпия қўмитаси президенти Томас Бах, БМТ Бош котиби Антониу Гутерриш, Жаҳон соғлиқни сақлаш ташкилоти бош директори Тедрос Гебреесус бор.

Олимпия ўйинлари 4-20 февраль кунлари, Паралимпия ўйинлари эса 4-13 март кунлари бўлиб ўтади.