Мирзиёев Қашқадарёдаги бир қатор камчиликларни санаб ўтди

Президент Мирзиёев Қашқадарё иқтисодиёти фақатгина йирик корхоналарга қараб қолмаслиги айтиб, вилоятнинг туристик имкониятларини кенгайтириш бўйича бир қанча таклифлар берди. Бу ҳақда Президент матбуот котиби маълум қилди.

Ёзилишича, вилоятда истеъмол товари ишлаб чиқаришда ўсиш суръатлари республика кўрсаткичидан 3 баробар кам. Айниқса, кичик бизнеснинг саноатдаги улуши энг охирги ўринларда.

“Ваҳоланки, Қамашида цемент, гипс ва мармар, Шаҳрисабзда графит, Яккабоғда кварц қуми, Чироқчида марганец, Китобда доломит ва чинни конларини ўзлаштириб, ишлаб чиқаришни  каррасига ошириш мумкин. Қашқадарёда йилига 150 минг тонна полиэтилен грануласи ишлаб чиқарилса-да, уни атиги 4 фоизи вилоятнинг ўзида қайта ишланади. “Шўртангаз кимё мажмуаси” атрофидаги 200 гектар бўш ерда 100 турдаги импорт маҳсулотини ишлаб чиқаришни йўлга қўйса бўлади”, дейди Президент.

Йиғилиш давомида Мирзиёев мутасаддиларга тадбиркорлар билан учрашиб, йирик саноат корхоналари билан кооперация асосида 10 мингта иш ўрни яратишни топширди. Қашқадарёда саноат ҳажмини келгуси йилда 40 триллион сўмга, экспортни 500 миллион долларга етказиш белгиланди.

Шунингдек, Президент томонидан вилоятда йилнинг тўрт мавсумида туристларни жалб қилиш учун салоҳият борлиги, лекин, бу ҳозир Шаҳрисабз тумани, Шаҳрисабз шаҳри ва Китоб билан чеклангани, йил бошидан вилоятга атиги 180 минг хорижий сайёҳ келгани айтилди.

“Янги тажриба қилиниб, германиялик ҳамкорлар билан Шаҳрисабз туманидаги 3 та туризм маҳалласининг мастер-режаси тайёрланди. Бунда, 450 миллион доллар қўшимча инвестиция ва йилига 1 миллион сайёҳ жалб этадиган инфратузилма яратилмоқда. Натижада тадбиркорларда иштиёқ кучайиб, бу лойиҳаларнинг 367 миллион доллари ёки 81 фоизини уларнинг ўзи тикяпти”, дейди  Мирзиёев.

Буни ҳисобидан Шаҳрисабзни ўзида йилига қўшимча 500 миллиард сўм тушум ҳамда мингта янги доимий иш ўрни пайдо бўлиши кутилмоқда.

Мутасаддиларга шу тажриба асосида йил якунигача Қамаши тумани ва Қарши шаҳрида ҳам лойиҳаларни ишга тушириш топширилди.