Мирзиёев ФВВ раҳбари нега ишдан олинганини айтди

Ўтган ҳафтада 2022 йилдан бери фавқулодда вазиятлар вазири бўлиб ишлаб келган генерал-майор Абдулла Қўлдошев ишдан олинганди. Бугун, 5 март куни Президент Шавкат Мирзиёев Сенатда бўлиб ўтаётган йиғилишда у ва унинг ўринбосарлари ишдан олинганининг сабабини айтди.

Маълум қилинишича, қурилишга рухсат бериш, бинони топширишда ёнғин хавфсизлиги бўйича бюрократия ва қонун бузилиш кўпайиб кетгани учун ўтган ҳафта фавқулодда вазиятлар вазири ва унинг ўринбосарлари ишдан олинган.

Шунингдек, Президент аҳолига ер бериш жараёнида фуқаролар ҳоким ва ўнга яқин идоралар ўртасида сарсон бўлиб юргани ва бу соҳа коррупция “ўчоғи”га айланганини айтди. Эндиликда эса ерни ҳоким қарори билан ажратишдан тўлиқ воз кечилиб, аукцион тизимига ўтилгани натижасида бу тизим халқчил бўлди.

Бундан ташқари, қурилиш соҳаси ҳам энг коррупциялашган соҳалардан бири эди. “Шаффоф қурилиш” дастури жорий этилганидан кейин бу йўналишда ҳам ижобий ўзгаришлар сезилмоқда.

Илгари инвестиция дастурига кирган объектларни қурадиган пудратчилар мингтага ҳам етмасди. Ўтган йили 13,5 мингта объект қурилишида 4 мингдан зиёд пудратчи иштирок этди. Соҳа рақамлашгани ҳисобига ўтган 4 йилда 3,6 триллион сўм бюджет маблағи тежалди.

Эслатиб ўтамиз, ўтган ҳафтада Ўзбекистон Республикаси Президентининг фармони билан Ботир Баҳромович Қудратхўжаев Ўзбекистон Республикаси Фавқулодда вазиятлар вазири лавозимига тайинланганди. Унга генерал-майор унвони ҳам берилди. кеча, 4 март куни Хуршид Тўлқинбоевич Сотиев Ўзбекистон Республикаси Фавқулодда вазиятлар вазирининг ўринбосари – Фавқулодда вазиятлар профилактикаси департаменти бошлиғи вазифасини бажарувчи лавозимига, Нуриддин Баҳриддинович Қодиров Ўзбекистон Республикаси Фавқулодда вазиятлар вазирининг ўринбосари – Маънавий-маърифий ишлар ва кадрлар билан таъминлаш департаменти бошлиғи вазифасини бажарувчи лавозимига тайинланди.