Mirziyoyev Andijonga yetib bordi

O‘zbekiston Respublikasi Prezidenti Shavkat Mirziyoyev hududlar rivoji, aholi hayoti bilan yaqindan tanishish maqsadida bugun, 15 aprel kuni Andijon viloyatiga yetib bordi. Bu haqda Prezident matbuot xizmati xabar berdi.

Tashrif chog‘ida davlat rahbariga Andijon xalqaro aeroportidagi modernizatsiya ishlari bo‘yicha axborot berilgan.

Ma’lum qilinishicha, bu aeroport 1978 yilda qurilgan bo‘lib, hozirgi talablarga mos kelmay qolgan edi. Uchish-qo‘nish yo‘lagining yuk ko‘tarish qobiliyati pastligi, zamonaviy yoritish tizimining yo‘qligi sababli qatnovlarni qabul qilish imkoniyatlari cheklangandi.

“Bugungi kunda rekonstruksiya ishlarining birinchi bosqichi bitkazildi. Uzunligi 3 ming 300 metr, kengligi 60 metr bo‘lgan yangi uchish-qo‘nish yo‘lagi, yurish yo‘lagi va samolyotlar to‘xtash joyi qurildi. Drenaj tizimi yangilanib, yer osti suvi qochirildi. Shuningdek, bu yerda ikkinchi yurish yo‘lagi qurilishi davom ettirilib, IKAO CAT-II toifasidagi radar, meteorologiya va yoritish uskunalarini o‘rnatish ishlari olib borilmoqda”, deyiladi xabarda.

Bildirilishicha, aeroportdagi modernizatsiya ishlari natijasida Boeing, Airbus rusumidagi yirik samolyotlarni ham, noqulay ob-havo sharoiti va tungi vaqtlarda ham qabul qilish mumkin bo‘ladi. Bu kunlik parvozlar sonini 10 barobargacha oshirish imkonini beradi.

Qayd etilishicha, endi, ikkinchi bosqichda yo‘lovchi terminalini yangidan qurish ko‘zda tutilgan. Bu orqali yo‘lovchilarga xizmat ko‘rsatish quvvati soatiga avvalgi 300 tadan 1000 taga, parvozlar soni yiliga 584 tadan 3 ming 700 taga ortadi. Bu Andijon shahri va Farg‘ona vodiysiga qatnovlar sonini ko‘paytirishga xizmat qiladi.

Faoliyatini qayta boshlagan mazkur aeroportda hozirda Toshkent – Andijon – Toshkent yo‘nalishi bo‘yicha parvozlar amalga oshirilmoqda. 

Davlat rahbari bu yerda samarali boshqaruvni yo‘lga qo‘yish, xizmatlarni arzon qilib, mahalliy va xalqaro parvozlarni ko‘paytirish bo‘yicha ko‘rsatmalar berdi.

Ma’lum qilinishicha, umuman, O‘zbekistonda aeroportlarni modernizatsiya qilish bo‘yicha katta ishlar amalga oshirilmoqda. O‘tgan yillarda Samarqand, Termiz, Urganch, Shahrisabz, Mo‘ynoq, Qo‘qon va Zomin aeroportlari yangilandi. Yana bir qator viloyatlarda modernizatsiya jarayonlari davom etmoqda.

Ma’lumot uchun, Andijon aeroporti aerodrom majmuasini to‘liq rekonstruksiya va modernizatsiya qilish munosabati bilan 2023 yil 1 aprel kuni yopilgan. Aerodrom qoplamasining elementlari – uzunligi 2985 metr va kengligi 44 metr bo‘lgan uchish-qo‘nish yo‘lagi, yurish yo‘lagi va perroni uzoq xizmat muddati va past yuk ko‘tarish qobiliyati tufayli rekonstruksiya qilinishi talab etilgan va ko‘plab turdagi samolyotlarni qabul qilishda, shuningdek, zamonaviy yoritish tizimining yo‘qligi sababli tungi vaqtda reyslarni qabul qilishda cheklovlar mavjud bo‘lgan.

Eslatib o‘tamiz, joriy yil 15 mart kuni aeroportda rekonstruksiyaning birinchi bosqichi yakunlanib, uning doirasida aerodrom majmuasining salmoqli qismi, jumladan, uzunligi 3300 metr va eni 60 metr bo‘lgan 4E toifadagi yangi uchish-qo‘nish yo‘lagi, bitta yurish yo‘lagi va 3 ta samolyot to‘xtash joyiga ega perron qurilishi o‘z nihoyasiga yetgandi. 20 mart kuni Andijon xalqaro aeroporti birinchi US601 yo‘lovchi reysini qabul qilgan. Bortida 63 yo‘lovchi bo‘lgan samolyot Toshkent vaqti bilan soat 12:13 da qo‘ngan. An’anaga ko‘ra, samolyot suv arkasi bilan, yo‘lovchilar esa karnay va surnay sadolari ostida kutib olingan.