Мирзиёев АҚШ сенаторини қабул қилди

Ўзбекистон Республикаси Президенти Шавкат Мирзиёев кеча, 5 ноябрь куни Вашингтон шаҳрига амалий ташриф доирасида ўзига ажратилган қароргоҳда АҚШ Сенатидаги Марказий Осиё бўйича кокуснинг ҳамраиси, сенатор Стив Дэйнсни қабул қилди. Бу ҳақда Президент матбуот хизмати хабар берди.

Учрашувда Ўзбекистон билан АҚШ ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилган.

Давлат раҳбари парламентлараро алоқаларга, хусусан, Сенатдаги Марказий Осиё бўйича кокус фаолиятига юқори баҳо берган.

Икки томонлама ҳамкорликда мисли кўрилмаган юксак даражага эришилгани мамнуният билан қайд этилган.

Сенатор Стив Дэйнс вакиллик қилаётган Монтана штати билан фаол ҳамкорликни давом эттиришга алоҳида эътибор қаратилган. Штат ишбилармонларининг делегациясини Ўзбекистонга ташрифини ташкил этиш бўйича келишувга эришилган.

Шунингдек, томонларни қизиқтирган долзарб халқаро ва минтақавий масалалар юзасидан фикр алмашилган.

Эслатиб ўтамиз, аввалроқ авкат Мирзиёев Вашингтон шаҳрига ташриф доирасида кеча, 5 ноябрь куни ўзига ажратилган қароргоҳда АҚШ Конгресси Вакиллар палатаси аъзолари Билл Хайзенга, Кэрол Миллер ва Сидни Камлагер-Давни қабул қилганди.