МФЙлар ишига ноқонуний аралашганлик учун жарима жорий қилинади

Жамият 5173
image

Фуқароларнинг ўзини ўзи бошқариш органлари фаолиятига қонунга хилоф равишда аралашганлик учун жарима жазоси белгиланиши мумкин. Маъмурий жавобгарлик тўғрисидаги кодексга тегишли ўзгартиришларни киритиш тўғрисидаги қонун лойиҳаси муҳокама учун эълон қилинди.

Қонун лойиҳасига мувофиқ кодекс қуйидаги мазмундаги 1934, 1935, 1936-моддалар билан тўлдирилади:

 “1934-модда. Фуқароларнинг ўзини ўзи бошқариш органлари фаолиятига қонунга хилоф равишда аралашиш

Мансабдор шахслар томонидан фуқароларнинг ўзини ўзи бошқариш органлари фаолиятига қонунга хилоф равишда аралашиш, яъни фуқаролар йиғинлари ходимларини уларнинг вазифалари ва фаолият йўналишлари билан боғлиқ бўлмаган йиғилишлар ва бошқа тадбирларга жалб қилиш, уларга тааллуқли бўлмаган вазифаларни юклаш, улардан қонун ҳужжатларида назарда тутилмаган маълумотнома, таҳлилий материал ва статистик маълумотларни тақдим этишини талаб қилиш ҳамда фуқаролар йиғинлари балансида бўлган биноларни бошқа шахсларга бириктириш ёки асоссиз равишда олиб қўйиш, –

базавий ҳисоблаш миқдорининг уч баравари миқдорида жарима солишга сабаб бўлади.

Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

базавий ҳисоблаш миқдорининг беш баравари миқдорида жарима солишга сабаб бўлади.

1935-модда. Фуқаролар йиғини қарорини бажармаганлик ёки лозим даражада бажармаганлик

Фуқаролар йиғинининг ўз ваколатлари доирасида қабул қилган қарорларини бажармаганлик ёки лозим даражада бажармаганлик, –

фуқароларга базавий ҳисоблаш миқдорининг бир баравари, мансабдор шахсларга эса – уч баравари миқдорида жарима солишга сабаб бўлади.

Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

фуқароларга базавий ҳисоблаш миқдорининг уч баравари, мансабдор шахсларга эса — беш баравари миқдорида жарима солишга сабаб бўлади.

1936-модда. Фуқаролар йиғини раиси фаолиятининг кафолатларини бузиш

Фуқаролар йиғини раисининг ишига тўсқинлик қилиш, уни ўз лавозимидан воз кечишга мажбурлаш, фуқаролар йиғини раиси фаолиятининг кафолатларини бузиш, шунингдек мансабдор шахслар томонидан уларнинг мурожаатларини кўриб чиқмасдан қолдириш ёки уларни кўриб чиқиш муддатларини узрли сабабларсиз бузиш, –

фуқароларга базавий ҳисоблаш миқдорининг бир баравари, мансабдор шахсларга эса – уч баравари миқдорида жарима солишга сабаб бўлади.

Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

фуқароларга базавий ҳисоблаш миқдорининг уч баравари, мансабдор шахсларга эса – беш баравари миқдорида жарима солишга сабаб бўлади”.

Таклиф этилаётган Қонун лойиҳасининг қабул қилиниши:

биринчидан, фуқаролар йиғинлари ходимларини уларнинг хизмат вазифасига кирмайдиган қўшимча ишлар ва йиғилишларга жалб этишнинг олдини олади;

иккинчидан, фуқаролар йиғинлари фаолиятига қонунга хилоф равишда аралашган ёки унинг қарорларини бажармаган, шунингдек фуқаролар йиғини раиси фаолиятининг кафолатларини бузган фуқаролар ва мансабдор шахслар маъмурий жавобгарликка тортилади;

учинчидан, аҳоли томонидан билдирилган муаммолар ўз вақтида бартараф этилади;

тўртинчидан, фуқаролар йиғинларининг ўрни ва мавқеи мустаҳкамланади;

бешинчидан, фуқаролар йиғинлари ходимларининг ўз ваколатлари доирасида фаолият юритишлари учун шароит яратилади.

Ушбу Қонун лойиҳасини қабул қилиш Ўзбекистон Республикаси Давлат бюджетидан харажат қилишни талаб этмайди.

Суннатилла Абдуллаев
Мақолага баҳо беринг
Баҳолаганлар: 119
Рейтинг: 2.9
t
×