Мейвезер Логан Пол билан боғлиқ можароларга муносабат билдирди

Бешта вазн тоифасида собиқ жаҳон чемпиони Флойд Мейвезер блогер Логан Полнинг унга кўргазма жанги учун ҳали ҳам пул бермагани ҳақидаги айбловларига жавоб қайтарди.

“Бу унинг олиши керак бўлган пули. Менга блогерлар ёқади. Лекин чипталар савдоси ва трансляция учун тўловларни олиш учун вақт талаб этилади. Ҳеч нарса тез содир бўлмайди. Мен ҳали ҳам етти-саккиз йил олдин бўлган жангларим учун чекларни йиғаман. Пол ҳаётида олган энг катта маошидан роҳатланиши керак”, дейди Мейвезер.

Маълумот учун, ушбу дуэль ўтган йилнинг 7 июнь куни АҚШнинг Маями шаҳридаги "Hard Rock Stadium" аренасида ўтказилган эди. Жанг регламентида ҳар бири уч дақиқадан саккизта раунд ўтказилиши назарда тутилган. Агар жанг тўлиқ давом этадиган бўлса, ғолиб номи эълон қилинмаслиги керак эди ва якунда шундай ҳам бўлди. Шу билан бирга, нокдаун ва нокаутларга ҳам қоидалар бўйича рухсат берилган.

Мейвезернинг бу жангдаги кафолатланган улуши 10 миллион долларни ташкил этган. Бундан ташқари, у трансляция ва чипталар савдосидан 50 фоиз олиши ҳам белгиланган. Полга келсак, унинг кафолатланган улуши 250 000 доллар ва чипталар сотуви ҳамда трансляциядан тушадиган маблағнинг 10 фоизини ташкил қилиши керак эди.

Шахбоз Қаҳҳоров