Месси туфайли Аргентинанинг Хитойдаги ўйинлари сўроқ остида қолди

“Интер Майами” клуби ҳужумчиси Лионель Месси Гонгконгдаги маҳаллий жамоа билан ўйинда иштирок эта олмагани сабабли юзага келган можаро Аргентина терма жамоаси учун салбий оқибатларга олиб келиши мумкин. Бу ҳақда ТАСС ахборот агентлиги хабар берди.

Гап шундаки, бир неча кун аввал “Интер Майами” Гонконгга қарши ўртоқлик ўйини ўтказди, Лионель Месси эса жароҳати сабаб баҳсда иштирок этмади, бироқ бир неча кундан кейин Япониядаги ўйинда майдонга тушди, бу эса хитойлик футбол мухлисларининг кескин норозилигига сабаб бўлди.

Аргентина терма жамоасимарт ойида Хитойда Нигерия ва Кот-д'Ивуар терма жамоалари билан ўртоқ ўйинларида майдонга тушиши режа қилинган, бироқ иккала ўйин ҳам Хитой ҳукумати томонидан бекор қилиниши мумкин.

Эслатиб ўтамиз, аввалроқ яна бир футбол юлдузи Криштиану Роналду ҳам жамоасининг Хитой турнеси доирасидаги ўйинларида майдонга туша олмаслигини айтганди ва “Ал-Наср”нинг Хитой сафари бекор қилинганди.