Месси “Барселона”га янги лавозимда қайтиши мумкин

Лионель Месси келажакда “Барселона”га янги лавозимда қайтиши мумкин. Каталония клуби аргентиналик юлдузни футболчилик фаолиятини якунлаганидан сўнг мураббийлик ёки бошқа спорт бошқаруви лавозимларидан бирига жалб этиш имкониятини муҳокама қилмоқда. Бу ҳақда “El Nacional” нашри хабар берди.

Месси “Барселона” сафида 2003–2021 йиллар давомида фаолият олиб борган ва клуб тарихидаги энг яхши футболчилардан бири ҳисобланади. Шу давр мобайнида у барча мусобақаларда 778 та ўйинда майдонга тушиб, 672 та гол урган ҳамда 35 та совринни қўлга киритган. Улар орасида 10 та Ла Лига чемпионлиги ва 4 та Чемпионлар Лигаси ғалабаси кубоги ҳам бор.

Ҳозирда Лионель Месси MLS'да “Интер Майами” клуби сафида тўп сурмоқда ва жамоа билан 2028 йил якунига қадар мўлжалланган шартномага эга.

Эслатиб ўтамиз, аввалроқ Мессининг синглиси Мария Соль Месси АҚШнинг Майами шаҳрида йўл-транспорт ҳодисасига учради.