Мерос қайғуси: Дональд ва Мелания Трамп ўртасидаги никоҳ шартномаси ўзгарди

Мелания Трамп турмуш ўртоғи, АҚШнинг собиқ президенти Дональд Трампнинг келаси йили бўлиб ўтиши режалаштирилаётган президентлик сайловларидаги эҳтимолий ғалабаси фонида у билан никоҳ шартномаси шартларини ўзгартирди. Бу ҳақда “Газета.ru” нашри хабар берди.

Билдирилишича, сўнгги бир йил ичида Трамп хоним ўз жамоаси билан янги "никоҳдан кейинги" шартномани имзолаш бўйича ёпиқ музокаралар олиб борган. Ушбу ҳужжатни қайта кўриб чиқиш собиқ президент ва Мелания Трампнинг оилавий ҳаёти бошланганидан бери учинчи марта содир бўлмоқда.

Маълумотларга кўра, Мелания ўғли Беррон учун мулкни сақлаб қолиш ва кўпайтиришга ҳаракат қилмоқда. Жумладан, янги шартномадаги тегишли бандлар эр-хотиннинг пули ва мулкини ҳам қамраб олади. 

Оқ уй собиқ эгасининг пуллари миқдори унча-мунчада очиқланмаса-да, анчагина бойликка эгалиги кўпчиликка маълум. Шу боис сўнгги пайтларда Трамп атрофида содир бўлаётган воқеалар хотинини ажримдан сўнг ўзи ва ўғлининг келажаги ҳақида ўйлашга мажбур қилган. 

Маълумот учун, жуфтликнинг ёши ўртасидаги 24 йиллик тафовутга қарамай, жуфтликнинг муносабатлари бошланганига қарийб 20 йил бўлди. Ўша пайтдаги оддий миллиардер Дональд Трамп ва машҳур модель Мелания Кнавснинг унаштирув маросими 2004 йилда бўлиб ўтган. Ўшанда Трамп бўлажак рафиқасига 1,5 миллион доллар қийматга эга 15 каратли узук совға қилган. Тўй маросими эса 2005 йилда ўтказилган. Энг яхши Dior тикувчилари Меланиянинг 27 килограмм келинлик либосини тикиш учун 550 соат вақт сарфлаган. Тўй учун махсус тайёрланган бир ярим метр баландликдаги тортни эса меҳмонлар еб битира олмаган. 

Эслатиб ўтамиз, Трампнинг сиёсат оламидаги рақобатчиси Жо Байден сўнгги вақтларда ёши ва хатти-ҳаракатлари билан тарафдорларини йўқотиб бормоқда. Бу эса унинг сайловдаги асосий рақиби Трамп учун ғалаба имкониятини оширади.