Менда бундай оқшомлар кўп бўлмайди. Бу унутилмас кеча бўлди – Карло Анчелотти

Кеча, 9 март оқшомида Европа Чемпионлар лигаси нимчорак финал жавоб учрашувлари доирасида, Мадриднинг “Реал” клуби ПСЖ жамоасини меҳмон қилди ва Карим Бенземанинг хет-триги туфайли 3-1 ҳисобидаги ишончли ғалабага эришди.

Мадридликлар устози Карло Анчелотти учрашувдан кейин ўтказилган матбуот анжуманида,“Реал Мадрид” ўйиннинг сўнгги 30 дақиқасида ПСЖга ҳеч қандай имконият қолдирмаганини айтиб ўтди. Шунингдек, Анчелотти унинг ҳаётида бундай оқшомлар кўп бўлмаслиги ва бу унутилмас кеча бўлганини ҳам таъкидлаган.

“Ғалабага эришиш осон бўлмади, лекин биз юксак сабр намойиш қилдик. Бенземанинг яхши босими биринчи голни уришга имкон берди. Шу пайтдан бошлаб, “Сантяго Бернабеу” сеҳирли майдонга айланди. Биринчи гол бизга куч берди ва рақибни мағлуб қилишга бўлган ишонч пайдо бўлди. Охирги 30 дақиқа давомида майдонда фақат битта жамоа бор эди. Яхши ўйнасак, ҳамма нарсага қодирмиз. Учрашувнинг бошланиши жамоа учун омадли бўлмади, аммо биз ўйин динамикасини ўзгартиришга муваффақ бўлдик, характер кўрсатдик. Бизнинг жамоамиз фантастик ва йигитларимда ўзига хос сеҳр бор. Менда бундай оқшомлар кўп бўлмайди. Бу унутилмас кеча бўлди”,  деган Анчелотти.

Маълумот ўрнида, Парижда бўлиб ўтган дастлабки учрашувда, ПСЖ ишончли ўйин кўрсатиб, Килиан Мбаппенинг ягона голи эвазига ғалаба қозонганди. Жавоб ўйини олдидан ҳам парижликларнинг имконияти юқори баҳоланганди. Афсус, натижа ундай бўлиб чиқмади.

Маъруф Абдумаликов