Мексикалик машҳур боксчи Тошкентга келяпти

Иккинчи енгил вазн тоифасида WBC чемпиони, WBA ва IBF камарлари соҳиби, мексикалик таниқли боксчи Хулио Сезар Чавес Бутунжаҳон бокс конфедерациясининг (WBC) 61-конвенцияси муносабати билан Тошкентга келади. Бу ҳақда Ўзбекистон профессионал бокс федерацияси матбуот хизмати хабар берди.

Бошқа бокс афсоналари қаторида Чавес ҳам Ўзбекистон пойтахтида ўтказиладиган WBC'нинг юбилей тадбирларида иштирок этади.

Маълумот учун, Хулио Сезар Чавес 1962 йил 12 июль куни Мексиканинг Сбюдад-Обрегон шаҳрида дунёга келган. Профессионал рингда 1980 йил 5 февраль куни дебют қилган. 1984 йилнинг сентябрида иккинчи ярим енгил вазнда вакант қолган WBC чемпионлик камари учун Марио Мартинесга қарши жанг қилиб, рақибини 8-раундда техник нокаутга учратган. Бу унинг фаолиятидаги илк чемпионлик камари ҳисобланади.

Чавес 1985-1987 йиллар оралиғида Рубен Кастильо, Рожер Мейвезер, Дуайт Пратчетт, Фаустино Мартирес Барриос, Рефужио Рохас, Рокки Локриж, Хуан Ла Порте, Франциско Крус ва Данило Кабрерони мағлуб этиб, ўзига тегишли WBC камарини ҳимоя қилган. 1987 йил Хулио енгил вазнга ўтди ва WBA чемпиони Эдвин Росариони 11-раундда нокаутга учратган. 1989 йилда биринчи ярим ўрта вазнга ўтиб, Рожер Мейвезерни иккинчи бор таслим этиб, учинчи камарига эга чиқди.     

Чавес профбоксдаги сўнгги жангини 2005 йил 17 сентябрь куни ўтказди. У профрингдаги 25 йиллик фаолияти давомида Рожер Мейвезер, Оскар Де Ла Хойя, Пернелл Уитакер, Фрэнки Рэндалл, Константин Цзю сингари афсоналарга қарши жанг қилган. У жами 115 та жанг ўтказиб, 107 ғалаба (86 нокаут), 6 мағлубият ва 2 та дуранг қайд этган. Шунчаки даҳшатли статистика. Тўрт йил (1990-1993) давомида “The Ring” журнали томонидан дунёнинг энг яхши боксчиси деб топилган. 

Таъкидлаш жоиз, 1993 йил 20 февраль куни Хулио Сезар Чавес Мехикодаги “Эстадио Ацтека” стадионида америкалик Грег Хогенга қарши чемпионлик жангида рингга кўтарилган. Ушбу жангни томоша қилиш учун аренага 130 мингдан зиёд томошабин келган. Чавес рақибини 5-раундда техник нокаутга учратиб, ярим ўрта вазндаги WBC камарини муваффақиятли ҳимоя қилганди.