Medvedchuk va uning xotiniga tegishli mulklar hibsga olindi

Lvov sudi Ukrainadagi “Muxolifat platformasi – “Hayot uchun” partiyasi siyosiy kengashi rahbari Viktor Medvedchuk va uning rafiqasi Oksana Marchenkoga tegishli avtomobillar, kvartiralar va uylarni xatladi. Bu haqda Ukraina Davlat tergov byurosi saytida xabar berildi.

“13 aprel kuni Lvovning Lichakov tuman sudi Davlat tergov byurosi va Bosh prokuratura taklifiga binoan Ukraina xalq deputati Viktor Medvedchuk va uning rafiqasi Oksana Marchenkoning yana 154 ta ko‘char va ko‘chmas mulk ob’ektlarini hibsga oldi”, deyiladi hisobotda.

Agentlik ma’lumotlariga ko‘ra, hibsga olingan mol-mulk orasida 26 ta avtomobil, 30 ta yer uchastkasi, 23 ta uy, 32 ta xonadon, 17 ta avtoturargoh va motorli yaxta mavjud. Bundan tashqari, 25 ta kompaniyaning ustav kapitalidagi ulushlari hibsga olingan, ularning haqiqiy egasi, Ukraina Davlat tergov byurosi ma’lumotlariga ko‘ra, Viktor Medvedchuk yoki uning rafiqasi hisoblanadi.

“Davlat tergov byurosi tergovchilari va Bosh prokuratura prokurorlari allaqachon Medvedchukning yaxtasi va boshqa ko‘chmas mulklarini sud orqali musodara qilgan”, deya qo‘shimcha qildi byuro.

Eslatib o‘tamiz, 12 aprel kuni Ukraina Prezidenti Vladimir Zelenskiy uy qamog‘idan qochib ketgan siyosatchi Viktor Medvedchuk qo‘lga olinganini ma’lum qildi. Zelenskiy Rossiyaga uni ayirboshlashni taklif qilgan.  

Ukraina parlamenti deputati, “Oppozitsionnaya platforma – Za jizn” partiyasi yetakchisi Viktor Medvedchuk kremlparast va Prezident Vladimir Putinga yaqin siyosatchi hisoblanadi. U ikki jinoiy ish bo‘yicha davlatga xiyonatda gumon qilinmoqda. 

2021 yil 12 mayda deputatga ishg‘ol qilingan Qrimda milliy boyliklarni talon-toroj qilish, davlat sirlarini oshkor qilish va davlatga xiyonat qilish, urush qonunlari va odatlarini buzish va Ukrainaga qarshi qo‘poruvchilik faoliyatini amalga oshirish (Jinoyat kodeksining 111 va 438-moddalari) ayblovi qo‘yilgan. 

O‘sha yilning oktyabr oyida Medvedchukga “ko‘mir ishi” nomini olgan (Jinoyat kodeksining 111-moddasi va 258-3-moddasi 1-qismi) ish bo‘yicha xiyonat va terrorizmga sheriklik ayblovi e’lon qilingan.