МДҲ доирасида гуманитар миналардан тозалаш бўйича қўшма бўлинма тузилади

Мустақил Давлатлар Ҳамдўстлиги (МДҲ) доирасида гуманитар миналардан тозалаш бўйича қўшма муҳандислик бўлинмасини ташкил этиш режалаштирилган. Бу ҳақда бугун, 12 октябрь Баку шаҳрида бўлиб ўтган МДҲ давлатлари Қуролли кучлари штаб бошлиқлари қўмитасининг йиғилишида сўз очилган. Унда Озарбайжон, Беларусь, Қозоғистон, Қирғизистон, Тожикистон, Ўзбекистон ҳарбий делегациялари ҳамда МДҲ Мудофаа вазирлари кенгаши котибияти иштирок этди.

“Учрашувда Радиация,  кимёвий ва биологик мудофаа қўшинлари ҳолатини мониторинг қилиш ва баҳолаш бўйича қўшма тизимнинг ишлаш тажрибаси сарҳисоб қилинди ва уни янада ривожлантириш йўналишлари белгиланди. Ҳамдўстлик давлатлари қуролли кучларини гуманитар миналардан тозалаш бўйича қўшма муҳандислик бўлинмасини шакллантириш ва тайёрлашнинг амалий масалалари келишиб олинди”, дейилади Россия Федерацияси Мудофаа вазирлиги хабарида. 

Бундан ташқари, йиғилиш иштирокчилари МДҲ давлатлари Қуролли кучлари учун учувчисиз учиш аппаратларига эга комплекслардан фойдаланиш ва улардан фойдаланиш соҳасида мутахассислар тайёрлашни такомиллаштириш йўлларини белгилаб берди. 

Шунингдек, мамлакатларнинг 2025 йилгача бўлган ҳарбий ҳамкорлиги масалалари муҳокама қилинди.  

“Қўшма иш давомида делегациялар раҳбарлари дунёда ривожланаётган ҳарбий-сиёсий вазият юзасидан фикр алмашдилар, МДҲ мамлакатлари хавфсизлиги ва минтақавий барқарорликка таҳдидларни ўзгартириш йўналишларини таҳлил қилдилар”, дейилади вазирлик хабарида.  

Бундан ташқари, МДҲ мамлакатлари ҳарбий идоралари ўртасидаги ўзаро ҳамкорликни янада ривожлантириш йўналишлари белгилаб олинди.  

“МДҲ аъзоларининг 2025 йилгача бўлган ҳарбий ҳамкорлиги концепциясида белгиланган умумий ёндашувлардан келиб чиққан ҳолда, бош штаблар раҳбарлари ҳарбий соҳадаги ҳамкорликни янада ривожлантириш йўлларини муҳокама қилдилар, қўшма ҳарбий ҳамкорлик тадбирларини фаол амалга оширишга алоҳида эътибор қаратдилар”, дейилади хабарда.