Марказий Осиё давлатларида аҳоли пулни нималарга кўп сарфлайди?

МДҲ мамлакатларида яшовчи аҳоли озиқ-овқат ва уй-жой учун кўпроқ пул ишлатади, хусусан Ўзбекистонда ҳам. Бу ҳақда “Numbeo” платформаси маълумотларида келтирилган.

Бу мамлакатларда харажатларнинг асосий қисми муҳим эҳтиёжлар – озиқ-овқат ва уй-жойга сарфланади. Кийим-кечак, транспорт, спорт ва ўйин-кулгига сезиларли даражада кам харажат қилинади, бу минтақадаги оилалар биринчи навбатда асосий эҳтиёжларни қондиришга ҳаракат қилаётганини кўрсатади.

Тожикистон минтақада энг кўп озиқ-овқат харажатларига эга бўлиб, бюджетнинг 37,1 фоизни ташкил этади, бу эса озиқ-овқат харажатларининг энг катта қисмига айланади. Уй-жой ижараси – 20,5 фоиз, ресторанлар – 15 фоиз, транспорт – 11,1 фоиз, коммунал хизматлар – 5 фоиз. Тожикистонликлар кийим-кечак ва пойабзалга (6,4 фоиз), спорт ва дам олишга (4,9 фоиз) энг кам маблағ сарфлайди.

Қирғизистон ва Қозоғистонда ҳам худди шундай манзара: озиқ-овқат ва уй-жой бюджетнинг деярли ярмини ташкил қилади. Қирғизистонда озиқ-овқат 28,5 фоиз ва ижара 25,9 фоизни ташкил этган бўлса, Қозоғистонда бу кўрсаткичлар мос равишда 29,6 ва 23,3 фоизни ташкил қилади. Ҳар икки давлатдаги ресторанларга сарфланадиган харажатлар бюджетнинг 15 фоизидан 18 фоизигача бўлиб, транспорт 10 фоиздан 14 фоизгача, коммунал хизматлар эса 5 фоиздан ошмайди.

Туркманистон ва Ўзбекистонда ҳам озиқ-овқат ва уй-жой харажатлари етакчи ўринларни эгаллайди – мос равишда 35,1 ва 30 фоиз. Бироқ Туркманистонда коммунал тўловлар улуши кўпроқ (12,8 фоиз), Ўзбекистонда эса спорт ва ҳордиқ чиқаришга сарфланган харажатлар улуши кўпроқ (7,2 фоиз), бу Марказий Осиёдаги энг юқори кўрсаткичдир.

Бошқа МДҲ мамлакатлари билан солиштирганда, харажатлар таркиби ўхшашлигича қолмоқда. Россияда озиқ-овқат 29 фоиз, ижара 21,8 фоиз, ресторанлар 17,6 фоиз.

Беларусда бу улушлар мос равишда 29,3, 22,9 ва 19,2 фоизни ташкил қилади. Озарбайжон ва Арманистонда асосий харажатлар озиқ-овқат, ижара ва ресторанлар учун бўлиб қолмоқда – биргаликда улар оилавий бюджетнинг 60 фоиздан ортиғини ташкил қилади.