Макрон Нетаньяхунинг ғоясини “яқинлашиб келаётган фалокат” деб атади

Франция Президенти Эммануэль Макрон Исроилнинг Ғазодаги ҳарбий амалиётини кенгайтириш режасини кескин танқид қилиб, уни яқинлашиб келаётган “фалокат” деб атади. Президентнинг бу ҳақдаги сўзларини “Le Figaro” нашри келтирди.

Макроннинг айтишича, Ғазо шаҳри ва Ал-Маваси лагерларини қайта босиб олиш режаси мисли кўрилмаган фалокатни ва тугамайдиган урушга интилишни англатади. Франция раҳбарига кўра, бундай стратегиянинг биринчи қурбонлари исроиллик гаровдагилар ва Ғазо аҳолиси бўлади.

У сектордаги вазиятни барқарорлаштириш учун БМТ мандати остида халқаро коалиция тузишни таклиф қилиб, бу коалиция терроризмга қарши курашиш, Ғазодаги вазиятни барқарорлаштириш, унинг аҳолисини қўллаб-қувватлаш ҳамда тинчлик ва барқарорликни таъминлаши кераклигини айтган. 

Қолаверса, Макрон урушни дарҳол тугатиб, доимий ўт очишни тўхтатишни жорий этишга чақирган.

Бу Макроннинг Исроил Бош вазири Биньямин Нетаньяху ҳукумати томонидан Ғазо шаҳрини эгаллаш ва ҲАМАСнинг сўнгги таянч нуфталарини нишонга олиш режасига биринчи муносабати бўлди. Ушбу режа бутун дунёда кескин танқидларга сабаб бўлди. Нетаньяху эса бу вариантни “ҲАМАСга қарши урушни тугатишнинг энг яхши йўли” деб ҳисобламоқда. 

Макрон, шунингдек, Саудия Арабистони билан бирга Нью-Йоркда минтақавий иштирокчилар томонидан ҲАМАСни қуролсизлантириш ва гаровдагиларни озод қилиш бўйича биринчи бор бир овоздан чақириққа эришганини таъкидлаган.

Бундай миссия ғояси илк бор 30 июль куни БМТдаги конференцияда илгари сурилган эди. Ўшанда Қатар ва Мисрни ҳам ўз ичига олган 17 давлат ушбу ташаббусни қўллаб-қувватлаган. Миссия асосан тинч аҳолини ҳимоя қилиш, хавфсизлик бўйича масъулиятни Фаластин маъмуриятига ўтказишни қўллаб-қувватлаш ҳамда Фаластин ва Исроил учун хавфсизлик кафолатларини таъминлаш, жумладан, келажакдаги ўт очишни тўхтатиш режимига назорат ўрнатишга қаратилган бўлиши кўзда тутилган.

“Хавфсизлик кенгаши энди ушбу миссияни ташкил этиш ва унга мандат бериш устида ишлаши керак. Мен жамоамга ҳамкорларимиз билан бу ишни зудлик билан бошлашни топширдим”, дея қўшимча қилган Франция раҳбари. 

Эслатиб ўтамиз, кеча, 10 август куни Исроил Бош вазири Биньямин Нетаньяху Ғазо секторига тез орада янги ҳужумни бошланишини эълон қилиб, уни “нисбатан тез” якунлашни режалаштираётганини айтганди. Нетаньяхунинг билдиришича, Исроилда “ишни тугатиш” ва гаровга олинганларни озод этиш учун ҲАМАСни енгишдан бошқа иложи йўқ. Янги ҳужум ҲАМАСнинг қолган икки таянч нуқтасини йўқ қилишга қаратилган.