Магнус Карлсен америкалик шахматчини фирбгарликда айблади

Шахмат бўйича жаҳон чемпиони Магнус Карлсен америкалик гроссмейстер Ханс Ниманни ғирром ўйнашда айблади. Карлсен бу ҳақда ўзнинг Twitter саҳифасида пост қолдирган.

Жаҳон чемпионининг сўзларига кўра, у Champions Chess Tour турнирида Ниманнга атайин мағлуб бўлган.

“Мен Sinquefield Cup мусобақасида Xанс Ниманнга қарши учинчи тур ўйинидан сўнг турнирни тарк этиш ҳақида мисли кўрилмаган қарорга келдим. Бир ҳафта ўтгач, Champions Chess Tour турнирида Ниманнга қарши битта ҳаракат билан (атайин – таҳр.) таслим бўлдим. Биламан, менинг хатти-ҳаракатларим шахмат жамоатчилиги ичида кўпчиликни хафа қилди. Ўзимнинг ҳам хафсалам пир бўлди. Шахмат ўйнашни хоҳлайман. Мен шахматни энг яхши турнирларда, юқори савияда давом эттирмоқчиман”, деган Магнус Карлсен.

Норвегиялик жаҳон чемпиони мусобақа ташкилотчилари ва шахматни севадиган барчани хавфсизлик чораларини ва фирибгарликни аниқлаш усулларини кучайтиришга чақирган.

“Ўйлашимча, шахматда алдов борлиги катта муаммо ва бу ўйин учун хавф туғдиради. Шунингдек, турнир ташкилотчилари ва биз севадиган ўйиннинг яхлитлиги ҳақида қайғурадиган барча шахслар хавфсизлик чораларини ва шахмат тахтасида фирибгарликни аниқлаш усулларини кучайтириш борасида жиддий ўйлаб кўришлари керак. Ниманни сўнгги дақиқаларда Sinquefield Cup'га таклиф қилишганда, мен турнирни тарк этиш ҳақида жиддий ўйладим. Лекин барибир ўйнашга қарор қилдим”, деган Магнус Карлсен.

Карлсеннинг иддао қилишича, Ханс омма олдида тан олганидан кўра кўпроқ читерлик (cheat – алдамоқ, фириб бермоқ – таҳр.) қилган. Сабаби Ниманни Магнусга қарши ўйинда ўзини мутлақо ғайриоддий тутган. У энг қалтис вазиятларда ҳам асабийлашмаган ва ўзини ўйинга нисбатан эътиборсиз қилиб кўрсатган.

Шунингдек, норвегиялик шахматчи ўтмишда ва ҳозир рақибларига фирб бераётганлар билан ўйнашни истамаслигини алоҳида урғулаган. Карлсен бу сўзларини фирбгарлардан нима кутиш мумкинлигини олдиндан билмаслиги билан изоҳлаган.

Магнус Карлсен америкалик шахматчи айнан қандай кўринишда читерлик қилганини айтмаган. Бироқ, у яна бир нарсадан хабардорлигини ва бу ҳақида Ниманнининг рухсатисиз гапиролмаслигини қўшимча қилган.

Маълумот учун, Карлсен FIDE таснифига кўра, дунёнинг биринчи рақамли шахматчиси ҳисобланади. Унда 2861 рейтинг очкоси мавжуд.