Лиз Трасс Британия Бош вазири бўлди

Олам 7021
image

Буюк Британия Ташқи ишлар вазири Лиз Трасс ҳукмрон Консерватив партия етакчилиги учун курашда ғолиб чиқди. Бу ҳақда бугун, 5 сентябрь куни партия ичидаги овоз бериш натижаларига кўра маълум қилинди.

47 ёшли Трасс номзоди учун Консерватив партиянинг 81 326 нафар оддий аъзоси овоз берди. Унинг рақиби, 42 ёшли собиқ Молия вазири Риши Сунак 60 399 нафар овоз олди. Шундай қилиб, Трасс ҳукмрон партия раҳбари сифатида 6 сентябрь куни Бош вазир лавозимида Борис Жонсоннинг ўрнини эгаллайди ва янги ҳукуматни тузади.

Трасс Буюк Британиянинг 56-Бош вазири (ёки бу лавозимни бир неча марта эгаллаганларни ҳисобга олган ҳолда 78-ҳукумат раҳбари) ва қиролича Елизавета II давридаги 15-Бош вазирга айланади. У, шунингдек, Маргарет Тэтчер (1979 йилдан 1990 йилгача Вазирлар Маҳкамасига раҳбарлик қилган) ва Тереза Мэйдан (2016 йилдан 2019 йилгача) кейин Вазирлар Маҳкамасини бошқарган учинчи аёлга айланади.

Эслатиб ўтамиз, тез орада Жонсон эгаллаб турган лавозимини тарк этади. У жорий йилнинг 20 июль куни Бош вазир сифатида сўнгги бор Жамоалар палатасида нутқ сўзлаган.

2019 йилда Тереза Мэйнинг ўрнига Бош вазир лавозимини эгаллаган Жонсон 7 июль куни бош вазирлик ва Буюк Британия Консерватив партияси раҳбари лавозимини тарк этишини эълон қилди. У Вазирлар Маҳкамасининг янги раҳбари тайинлангунга қадар ишлашда давом этади.

Суннатилла Абдуллаев
Мақолага баҳо беринг
Баҳолаганлар: 281
Рейтинг: 3
t
×