Лапорта Мессига ҳайкал ўрнатилишини тасдиқлади 

“Барселона” клуби президенти Жоан Лапорта “Камп Ноу”да Лионель Мессига ҳайкал ўрнатиш режасини тасдиқлади ҳамда клубнинг собиқ бош мураббийи Хави Эрнандеснинг интервьюсига кескин муносабат билдирди. Бу ҳақда у “Mundo Deportivo” нашрига берган интервьюсида тўхталди.  

“Стадион қурилиши якунлангач, биз Мессига ҳайкал ўрнатмоқчимиз ва унинг шарафига хайрлашув ўйини ташкил этишни режалаштиряпмиз”, дейди Лапорта.

Шунингдек, у клубнинг собиқ бош мураббийи Хави Эрнандеснинг фикрларини танқид қилган.

“Хави интервьюларидан бирида нега уни истеъфога чиқарганимни гапирибди. У хотиржам бўлиб қолганди ва профессионал ҳамда шахсий ҳаёт ўртасидаги мувозанатни сақлай олмади. У “Барса” “Реал Мадрид” билан рақобатлаша олмаслигини айтди ва таркибни ўзгартиришни сўради. Шунда мен Хавига бундай ишлашни давом эттириб бўлмаслигини айтдим”, дейди Лапорта.  

Аввалроқ, Хави Эрнандес “Барселона” раҳбариятини ўз фаолияти давомида жамоани кучайтириш масаласида иккиланиб қолганини, шунингдек клубдан кетишига оид айрим тафсилотларни ҳам ошкор қилганди.

Эслатиб ўтамиз, Хави ўз интервьюсида Мессининг “Барселона”га қайтиши деярли ҳал бўлган пайтда Лапорта ҳаммасини бекор қилгани ҳақида ҳам айтиб ўтганди.