Куба 3 ойлик нефть блокадасидан сўнг АҚШ билан музокараларни бошлади

Куба Президенти Мигель Диас-Канел оролнинг уч ойлик амалдаги нефть блокадасидан сўнг АҚШ Президенти Дональд Трамп маъмурияти билан музокаралар олиб бораётганини илк бор расман тасдиқлади. Бу ҳақда “Cubadebate” хабар берди.

Нашр келтирган баёнотга кўра, мулоқотдан мақсад – икки томонлама келишмовчиликларни мулоқот орқали ҳал қилиш, умумий таҳдидларга қарши ҳамкорлик йўналишларини белгилаш ва Лотин Америкасида хавфсизликни мустаҳкамлашдир. Шу билан бирга, Куба етакчиси бу жараён анча вақт талаб қилиши мумкинлигидан огоҳлантирган.

Музокаралар Вашингтон томонидан мисли кўрилмаган босим ўтказилаётган бир пайтда бошланган. 2026 йил бошида АҚШ Венесуэладан Кубага етказиладиган ва оролнинг энергия эҳтиёжларининг 50 фоизигача қоплайдиган нефть таъминотини амалда тўсиб қўйди. Кўп ўтмай, Америка босими остида Мексика ҳам нефть етказиб беришни тўхтатди. Январь ойи охирида Трамп Куба томонидан миллий хавфсизликка таҳдид туфайли АҚШда фавқулодда ҳолат эълон қилди ва оролга бевосита ёки билвосита нефть етказиб берувчи давлатлардан товарлар импортига қўшимча божлар жорий этишга рухсат берди. Буларнинг барчаси Кубада оғир ёқилғи инқирозини келтириб чиқарди.

Эслатиб ўтамиз, аввалроқ “The Atlantic” нашрининг Оқ уйдаги манбалари аввалроқ Куба Трампнинг “Эрон ва Венесуэладан кейинги навбатдаги нишони” бўлиши мумкинлигини айтган эди. Январь ойида АҚШ Президенти, агар Гавана Вашингтон билан келишувдан бош тортса, оролни “дўстона эгаллаб олиш” имкониятини ҳам инкор этмади.  Шу билан бирга, “Bloomberg” ва “The Wall Street Journal“ манбаларига кўра, Оқ уйда режимни босқичма-босқич ўзгартириш режаси ишлаб чиқилган. Ушбу режа доирасида Трамп 1991 йилгача оролни қўллаб-қувватлаган Совет Иттифоқи ўрнини эгаллаб, Кубани молиявий жиҳатдан АҚШга қарам қилиб қўймоқчи.