Креатив индустрияни шакллантириш реал қўллаб-қувватлашни талаб этади – Саида Мирзиёева

Бугун, 2 июнь куни Ўзбекистон Президенти “Маданият, санъат ва адабиёт соҳаларини янада ривожлантириш бўйича кенг кўламли чора-тадбирлар тўғрисида”ги фармонни имзолади. Президент Администрацияси раҳбари Саида Мирзиёева ушбу фармон тарихий эканини айтиб, креатив индустрияни шакллантириш реал қўллаб-қувватлашни талаб этишини қайд этди. Бу ҳақда у ўзининг Telegram-каналида ёзди.

“Маданият ривожи учун нафақат илҳом, балки ижодий ғояларни рўёбга чиқариш имконини берувчи шарт-шароитлар ҳам жуда муҳим. Креатив индустрияни шакллантириш эса реал қўллаб-қувватлашни талаб этади. Бугун Президентимиз томонидан ана шундай кўмакни тақдим этувчи тарихий фармон имзоланди”, дейди Саида Мирзиёева.

Фармонга кўра, “Ижодга инвестиция” давлат мақсадли жамғармаси таъсис этилмоқда. Истиқболли ижодий лойиҳаларни молиялаштириш учун ушбу жамғармага ҳар йили 200 миллиард сўм маблағ йўналтирилади.

Шунингдек, эндиликда концерт ташкилотчилиги билан шуғулланувчи тадбиркорлар, фильм ва сериал тасвирга олувчи кинокомпаниялар, болалар учун контент ишлаб чиқарувчилар, хусусий театр ва студиялар, маданият соҳасидаги хусусий таълим муассасалари қўшилган қиймат, фойда, айланма, ер, мулк солиқлари ҳамда ходимларнинг иш ҳақидан олинадиган жисмоний шахсларнинг даромад солиғидан озод этилади.

Хорижий кино компаниялари учун ҳам қулай шароитлар яратилади: уларнинг Ўзбекистон ҳудудида кино маҳсулотларини ишлаб чиқаришдан олган даромадлари норезидентларнинг даромади сифатида солиқ базасига киритилмайди.

Нуфузли халқаро ва республика танловлари ғолиблари пул мукофотлари билан тақдирланади: гран-при ва биринчи ўрин учун тегишли равишда 300 ва 100 миллион сўм, иккинчи ўрин учун 200 ва 50 миллион сўм, учинчи ўрин учун эса 100 ва 25 миллион сўм берилади.

Педагоглар ҳам қўллаб-қувватланади: ғолибларни тайёрлаган ўқитувчи ва концертмейстерларга йил давомида ойлик маошининг 100 фоизигача миқдорда устама тўланади.

Бундан ташқари, ҳар йили маданият, санъат ва ижод соҳалари вакиллари орасидан уй-жойга муҳтож бўлган минг нафар ходимга ипотека кредити дастлабки тўловининг 50 фоизи қоплаб берилади.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев маданият, санъат ва адабиёт соҳалари ходимларидан бир гуруҳига давлат мукофотларини топширган эди. Мазкур маросим давомида соҳа вакиллари билан ҳам мулоқот бўлиб ўтди ва уларга қатор енгилликлар берилиши айтилди.