Коррупцияда айбланган сенатор Менендес сиёсатдан кетди

Коррупцияда айбланган америкалик сенатор Боб Менендес кеча, 16 август куни мустақил номзод сифатида сайловдан чиқиб, воқеаларга бой сиёсий фаолиятини якунлаётганини айтди. Бу ҳақда “Америка овози” хабар берди.

Нью-Жерси штатидан сайланган 70 ёшли демократ 20 август куни 2006 йилдан бери ишлаб келаётган сенаторлик лавозимини тарк этишини аллақачон маълум қилган эди. Ўтган ой Нью-Йорк суди сенаторни товламачилик, адолатга тўсқинлик қилиш ва Миср ва Қатар билан алоқадор тадбиркорларга хизмат кўрсатиш учун пора олишда айбдор деб топди. 29 октябрь куни унга ҳукм чиқарилади ва сенатор умрининг қолган қисмини қамоқда ўтказиши мумкин.

"Сизга хабар бераманки, менинг исмим сайлов бюллетенидан олиб ташланишини хоҳлайман", деб ёзган у Нью-Жерси сайлов комиссари вазифасини бажарувчи Донна Барберга.

Менендеснинг мурожаати 20 августдан бошлаб Сенатда унинг ўрнини бошқа одам эгаллаши ҳақидаги эълон билан бир вақтга тўғри келди.

Нью-Жерсининг демократ губернатори Фил Мёрфи Жорж Менендеснинг январ ойида тугайдиган ваколат муддатининг қолган қисмида Самир Хелми Нью-Жерси вакили бўлишини эълон қилди.

"Бу давлат хизматидаги узоқ ва асосан самарали мартабанинг фожиали якунидир", деди Мёрфи.

Менендеснинг рафиқаси Надин ҳам бу ишда айбланган. У кўкрак бези саратонидан даволанмоқда ва унинг иши алоҳида кўриб чиқилади.

Унинг Нью-Жерсидаги уйини тинтув қилиш чоғида ФҚБ ходимлари бутун уй бўйлаб яширинган ярим миллион долларга яқин нақд пул, шунингдек, тахминан 150 минг долларлик олтин қуймалари ва ҳашаматли Mercedes-Benz кабриолетини топган.

Менендес Сенатнинг ташқи алоқалар қўмитаси раиси сифатида Америка ташқи сиёсатига сезиларли таъсир кўрсатди. У 11 ой олдин айбланганидан кейин бу лавозимдан кетган.