Китобларни тезроқ ва кўпроқ ўқиш усуллари

Ҳар бир китобнинг ўз олами, ўз ҳақиқатлари бўлади. Китобхонда эса керакли адабиётни саралаб, кўпроқ китоб ўқиш борасида доимо муаммолар учраб туради. Қуйида сизнинг эътиборингизга мутолаада кўпроқ маълумотларни эслаб қолиш ва албатта ундан завқ олишда ёрдам берадиган тавсияларни ҳавола этамиз.

Китобни якунлашингиз шарт эмас

Балки китоб қизиқарли бўлиб чиқмагандир? У ҳолда қимматли вақтни сарф этишдан не маъно? Яхшиси бошқа қизиқроқ китоб мутолаасини бошлаган маъқул. Иккинчи сабаб асосан нон-фикшен жанридаги илмий-оммабоп китобларга тегишли. Баъзида китобнинг муайян жиҳатларига қизиқасиз, бироқ ичингиздаги бошқа бир овоз барини ўқишга мажбурлайди. Унга қулоқ солманг. Кераклисини ўқинг. Вақтни беҳуда сарфламанг.

Маълумотни ўзлаштиринг

Маълумотни ўзлаштиришни ўрганинг. Унинг устида ишланг. Билиб олган фактларингиз ҳақида ўйланг. Дўстларингиз билан муҳокама қилинг. Ўз ижтимоий тармоқларингизда бу ҳақида ёзинг. Маълумотга қанча кўп вақт сарфласангиз, у хотирангизда узоқ вақтга ўрин топиш эҳтимоли ортади.

Парчаларни қайтадан ўқинг

Бу кўпинча нон-фикшен китобларга тегишли. Агар бирор маълумотни ёдда қолдиришни истасангиз, китобни ўқиб бўлгач, эртаси куни энг муҳим жойларини қайтадан ўқиш тавсия этилади. Маълумотни қайта ўзлаштириш билан бирга бу ўқилганларни яхшироқ эслаб қолишда ёрдам беради.

Мутолаага инструмент каби муносабатда бўлинг

Мутолаа маълумотни ўзлаштиришнинг бошқа усуллари каби бизга билим ва кўникма олишда зарур. Буни англасангиз, мутолаа жараёнига хотиржамлик билан муносабатда бўласиз.