Ким ҳарбий-денгиз қўшинларини кучайтиришга буйруқ берди

Шимолий Корея етакчиси Ким Чен Ин мамлакат суверенитетини ҳимоя қилиш учун ўз флотини жадал ривожлантириш зарурлигини айтди. Бу ҳақда у бугун, 6 октябрь куни Чве Хён эсминецини текшириш ва “Миллий мудофаани ривожлантириш 2025” кўргазмасининг очилиш маросимидаги нутқида сўз очди.

У флотнинг жанговар тайёргарлиги ва ҳарбий-техник жиҳозларини мустаҳкамлаш бўйича кўрсатмалар берди. Шунингдек, у янги “ўта қудратли ҳарбий кема” КХДР қуролли кучлари мустаҳкамланганини яққол намоён этишини ва республиканинг кемасозликдаги ютуқларини намойиш этишини алоҳида таъкидлади.

Давлат раҳбари эсминецнинг қуролланишини кўздан кечирди, экипаж ва денгиз пиёдаларини кема эксплуатациясига тайёрлаш бўйича кўрсатмалар берди. Ким Чен Ин “миллий суверенитет, хавфсизлик ва манфаатлар йўлида” ҳарбий-денгиз кучлари кучини ишлатиш ҳамда душманнинг эҳтимолий провокацияларини олдини олиш ва жазолаш зарурлигини таъкидлади.

“Миллий суверенитет ва хавфсизлик учун денгиз флотимизнинг қудратли кучи улкан океанда қўлланилиши керак, шунда биз душманнинг фитналарини тўлиқ тўхтата оламиз, уларга жавоб берамиз ва жазолай оламиз”, деган Ким Чен Ин.

5 минг тонналик Чве Хён жорий йилнинг апрель ойида сувга туширилган ва Шимолий Корея ҳарбий-денгиз кучларидаги энг йирик кема ҳисобланади. Кема товушдан тез стратегик қанотли ракеталар, тактик баллистик ракеталар ва бошқа зарба берувчи қуролларга эга.

Эслатиб ўтамиз, аввалроқ Шимолий Корея етакчиси Ким Чен Ин янги “махфий қурол” ишлаб чиқилишини эълон қилганди. Унинг сўзларига кўра, ушбу қурол мамлакат мудофаа қобилиятини сезиларли даражада мустаҳкамлайди.