Кичик Бердимуҳамедов янги шаҳар қурилишини тезлаштиришни талаб қилди

Олам 8428
image

Туркманистон Президенти Сардор Бердимуҳамедов ҳукуматдан жорий йилда Ахал вилоятининг янги маъмурий маркази қурилишини якунлашни талаб қилди. Бу ҳақда Туркманистон Давлат ахборот агентлиги хабар берди. 

Таъкидланишича, Туркманистон раҳбари маъмурий маркази Ашхобод чеккасидаги Аннау шаҳрида жойлашган Ахал вилоятида ҳукуматнинг жойдан ташқари йиғилишини ўтказган. Йиғилишда Бердимуҳамедов фойдаланилаётган қурилиш материаллари сифати ва белгиланган муддатларга риоя қилинмаслигидан ҳам норозилигини билдирган. 

Шу билан бирга, у янги шаҳарда қурилиш ишлари якунига етаётганини, ободонлаштириш босқичи бошланганини таъкидлаган. 

Туркманистон пойтахтидан 30 километр узоқликда жойлашган “Ахал сити” лойиҳаси бўйича қурилиш ишлари 2019 йилдан бери давом этмоқда. Шаҳар номи миллий муҳокамада танланади. Лойиҳа режасида 336 та объект, жумладан, 11 та жамоат биноси ва 26 та маъмурий бино, 19 та таълим муассасаси, 258 та турар-жой биноси, 8 та тиббиёт ва спорт иншоотлари, 14 та ички ва ташқи муҳандислик тизимлари ва иншоотлари қурилиши кўзда тутилган 

Ахал вилояти 1992 йилда ташкил топган, аввалроқ унинг ҳудуди Ашхобод вилояти деб аталган. Туркманистон пойтахти энди алоҳида ҳудудий бирлик ҳисобланади. Ахал вилоятининг ҳозирги маъмурий маркази Аннау шаҳри Туркманистон пойтахтидан саккиз километр шарқда жойлашган. Ахал вилоятининг янги пойтахти Ашхободнинг жануби-ғарбий қисмида қурилмоқда.

Рушана Султонова
Мақолага баҳо беринг
Баҳолаганлар: 316
Рейтинг: 3
t
×