Хусусий боғча учун олинган кредитларнинг имтиёзли даври узайтирилди

Хусусий боғча учун олинган кредитларнинг имтиёзли даври узайтирилди. Бу ҳақда Mактабгача таълим агентлиги маълум қилди.

“Президент Шавкат Мирзиёевнинг 2023 йил, 27 сентябрдаги 316-сонли қарорига асосан 2018-2022 йилларда давлат-хусусий шериклик(ДХШ) асосида нодавлат мактабгача таълим ташкилотларини ташкил этиш учун тузилган битимларга мувофиқ ажратилган имтиёзли кредитлар бўйича имтиёзли давр муддати 2024 йил 1 октябргача узайтирилди”, дейилади хабарда. 

Унга кўра:                 

• имтиёзли давр давомида тадбиркорлик субъектлари томонидан кредит бўйича фақат фоиз тўловлари амалга оширилади; 
• имтиёзли даврда тўланиши лозим бўлган асосий қарз бўйича тўловлар кредит даврининг қолган қисмига тенг миқдорда тақсимланади.

Шунингдек, Давлат-хусусий шериклик асосидаги нодавлат мактабгача таълим ташкилотларини ташкил этиш учун имтиёзли кредитлар лойиҳа ташаббускорларига қуйидаги табақалаштирилган фоиз ставкаларида ва шартларда ажратилади:                   

• Тошкент шаҳрида – 10 йил муддатга, шу жумладан 2 йиллик имтиёзли давр билан йиллик 12 фоиз ставка бўйича;
• Нукус шаҳри, вилоятлар марказлари ва вилоятга бўйсунувчи шаҳарларда – 10 йил муддатга, шу жумладан 2 йиллик имтиёзли давр билан йиллик 8 фоиз ставка бўйича;
• туманларда – 10 йил муддатга, шу жумладан 2 йиллик имтиёзли давр билан йиллик 5 фоиз ставка бўйича.

Эслатиб ўтамиз, аввалроқ Ўзбекистонда ватан ҳимояси ва тинчлиги йўлида яраланган ёки ҳалок бўлган ходимларнинг фарзандлари боғча тўловидан озод қилиниши ҳақида хабар берган эдик.

Машҳура Имомова