Хоразм соғлиқни сақлаш бошқармасига янги раҳбар тайинланди 

Соғлиқни сақлаш вазири Амрилло Иноятовнинг тегишли буйруғи билан Содиқжон Бобоевич Содиқов Хоразм вилояти соғлиқни сақлаш бошқармаси бошлиғи лавозимига тайинланди. Бу ҳақда Соғлиқни сақлаш вазирлиги Матбуот хизмати хабар берди.

44 ёшли Содиқжон Содиқов ушбу лавозимга тайинлангунига қадар Хоразм вилояти соғлиқни сақлаш бошқармаси бошлиғининг биринчи ўринбосари лавозимида ишлаб келаётган эди.

Маълумот учун, у 1979 йилда туғилган. 1-Тошкент давлат тиббиёт институти Урганч филиалини тамомлагач, меҳнат фаолиятини 2006 йилда Республика ихтисослаштирилган кардиология илмий-амалий тиббиёт маркази Хоразм филиалида кардиолог-шифокор сифатида бошлаган.

2009-2010 йилларда “Саломатлик-2” ҳамда “Аёллар ва болалар саломатлигини муҳофаза қилиш” қўшма лойиҳасининг вилоят бюроси директори сифатида ишлаган. Шунингдек, 2010–2021 йилларда вилоят соғлиқни сақлаш бошқармаси бошлиғининг умумий ва иқтисодий масалалар бўйича ўринбосари бўлиб хизмат қилган.