Хоманаий ўлган бўлиши мумкин – ОАВ

Эрон Олий раҳнамоси Оятуллоҳ Али Хоманаий 2026 йил 28 февраль куни эрталаб Исроил авиациясининг ялпи зарбалари оқибатида ҳалок бўлган бўлиши мумкин. Бу ҳақда Исроил нашрлари хабар берди.

Ислом Республикаси Олий раҳбарининг ўлими ҳақидаги хабарлар Теҳроннинг қарор қабул қилиш марказларига уюштирилган ва мамлакат Олий қўмондонлигининг амалда пароканда бўлишига олиб келган кенг кўламли ҳужум фонида пайдо бўлган.

“Эрон Олий раҳнамоси Оятуллоҳ Али Хоманаий йўқ қилинган бўлиши мумкин”, деб хабар берди “Исроил овози” ўз манбаларига таяниб.

“Ynet” маълумотларига кўра, Хоманаий эрталабки операция давомида йўқ қилинган ягона нишон эмас. Канал манбалари Исроил ҳужумлари оқибатида, шунингдек, Эрон Мудофаа вазири ва Ислом инқилоби муҳофизлари корпуси қўмондони ҳам ҳалок бўлганини даъво қилмоқда.

“Ушбу маълумотнинг расмий тасдиғи йўқ”, дейди нашр ва фаол жанговар ҳаракатлар ҳудудида маълумотларни текшириш давом этаётгани, бироқ режим раҳбарияти билан алоқа бутунлай узилганини қайд этган.

АҚШ–Исроил–Эрон уруши

Бугун, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Исроил томонидан старт берилган операция “Еҳуда қалқони” деб номланган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига «иммунитет» олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унфда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.