Хитойда осма кўприк узилиб кетиши оқибатида 5 киши ҳалок бўлди

Хитойнинг Шинжон-Уйғур автоном районидаги боғлардан бирида осма кўприк троси узилиб кетиши оқибатида беш киши ҳалок бўлди, яна 24 киши жароҳат олди. Бу ҳақда “Синьхуа” хабар берди.

Ҳодиса жорий йилнинг 6 август куни кечқурун Или-Қозоқ округига қарашли Човсу уездининг Шата ҳудудидаги осма кўприкда юз берган. Кўприк троси узилиб кетган ва оқибатда кўприк қопламаси қийшайган. 29 киши ундан тушиб кетган.

Ҳодиса оқибатида 5 киши ҳалок бўлган, 22 киши енгил тан жароҳати олган, яна икки киши оғир шикастланган. Барча жабрланганлар шифохонага етказилган. Ҳозирда боғ ташриф буюрувчилар учун ёпилган. Ҳодиса сабаблари бўйича тергов ишлари олиб борилмоқда.

Эслатиб ўтамиз, аввалроқ АҚШнинг Мэриленд штатидаги Балтимор шаҳрида юк кемаси бориб урилиши оқибатида узунлиги 2,5 км бўлган автомобиль кўприги сувга қулаб тушганди. Сингапур байроғи остидаги “Дали” кемаси кўприк таянчига урилиб, ёниб кетган. Иншоотнинг қулаши оқибатида бир неча автомобиль дарёга қулаган.