Хитой Россиядан рекорд даражада олтин сотиб олди

Ноябрь ойида Хитой Россиядан икки томонлама савдо доирасида рекорд даражада – 961 миллион долларлик олтин харид қилди. Бу кетма-кет иккинчи ой кузатилган йирик етказиб бериш бўлиб, октябрь ойида олтин импорти 930 миллион долларни ташкил этган. Бу ҳақда РИА Новости хабар қилди.

Маълумотларга кўра, 2025 йилнинг 11 ойи давомида Хитой Россиядан 1,9 миллиард долларлик олтин импорт қилган. Январь–сентябрь ойларида эса етказиб бериш ҳажми атиги 9 миллион доллар бўлган.

Таққослаш учун, 2024 йилнинг октябрь–ноябрь ойларида Россия Хитойга умуман олтин экспорт қилмаган. Ўша йилдаги энг юқори кўрсаткич 223 миллион доллар билан чекланган.

Шу билан бирга, “Bloomberg” июль ойида эълон қилган таҳлилий материалда Россиянинг Хитойга қимматбаҳо металлар экспорти 2025 йилнинг биринчи ярмида деярли икки баравар ошиб, 1 миллиард долларга етгани қайд этилган, бироқ ушбу миқдорнинг қанчаси айнан олтинга тўғри келиши аниқлаштирилмаган.

Мазкур кўрсаткичлар турли нашрлар томонидан турлича талқин қилинмоқда. Хусусан, ноябрь ўрталарида “Financial Times” газетаси таҳлилчилари Хитой Халқ банки эълон қилаётган расмий олтин харидлари ҳажмига шубҳа билан қаралаётганини ёзди.

Франциянинг молиявий гуруҳи экспертлари эса Хитой 2025 йилда жами 250 тоннагача олтин сотиб олган бўлиши мумкинлигини билдирди.

Мазкур рақам Хитой томонидан расман эълон қилинган ва Бутунжаҳон олтин кенгаши маълумотларида келтирилган кўрсаткичлардан қарийб 10 баравар юқори. Расмий ҳисоб-китобларга кўра, Хитой 2025 йилнинг январь–сентябрь ойларида 23,95 тонна олтин харид қилган.

Таҳлилчилар буни Пекиннинг захираларни долларда сақлашдан босқичма-босқич воз кечиш сиёсати билан изоҳламоқда.

Эслатиб ўтамиз, аввалроқ Хитойнинг олтини расмий рақамлардагидан анча кўплиги ҳақида хабар берилганди.