Хитой икки мамлакатга виза беришни тўхтатди

Бугун, 10 январь куни Хитой ҳукумати ушбу мамлакат фуқаролари учун жорий қилинган COVID билан боғлиқ чекловларга жавобан Жанубий Корея ва Япония фуқароларига қисқа муддатли визалар беришни тўхтатди. Бу ҳақда BBC нашри Сеул ва Токиодаги Хитой элчихоналари тарқатган хабарларга асосланиб маълумот бермоқда.

Қайд этилишча, Хитойнинг Сеулдаги элчихонаси Хитойга сайёҳлик мақсадида кирувчи Жанубий Корея фуқаролари учун визалар беришни тўхтатган. Япония нашрлари ҳам Хитой худди шундай чораларни япон фуқароларига нисбатан қўллаётганини ёзмоқда.

Пекиндаги ҳукумат ушбу чоралар жавоб чораси экани, Хитойга қарши “камситувчи” COVID чекловлари олиб ташланмагунча, жорий қилинган тартиб ўз кучида қолишини маълум қилган. Муаммо илдизи шуки, ўтган ҳафта Жанубий Корея Хитойдан келган фуқаролар учун туристик визалар беришни тўхтатди. Хитой Ташқи ишлар вазирлиги бу ҳодисани “қабул қилиб бўлмайдиган” ва “илмий асосга эга эмас” деб баҳолаган эди.

Жанубий Кореянинг Касалликларни назорат қилиш ва олдини олиш агентлигига кўра, Хитойдан келганларнинг қарийб учдан бир қисмида виза чекловлари жорий этилишидан олдин COVID учун мусбат (инфекция юқтирган) кўрсаткичи аниқланган. Кўпгина жанубий кореяликлар ўз мамлакатларини Хитойнинг коронавирус хуружидан ҳимоя қилиш ғоясини қўллаб-қувватламоқда, аммо Хитой фуқароларининг мамлакатга кириши учун киритилган чеклов фақат тиббий асосга эга эканлигига кўпчилик ишонмайди.

Айни пайтда Жанубий Кореяга кириш учун Хитойдан фақат оз сонли бизнес доиралари ва дипломатик вакилларга рухсат берилган. Улар жўнашдан олдин ҳам, келиш вақтида ҳам манфий  тест натижаларини кўрсатиши керак.