Хитой АҚШни Тайвань олдидаги мажбуриятларини унутмасликка чақирмоқда

Қўшма Штатлар "ягона Хитой" тамойилига амал қилиши ва Тайвань ороли олдидаги мажбуриятларини ёдда тутиши керак. Бу ҳақда бугун, 18  октябрь куни брифингда Хитой Ташқи ишлар вазирлиги расмий вакили Ван Вэньбинь маълум қилди. 

“Қўшма Штатлар "Ягона Хитой" тамойилини қўллаб-қувватлаш бўйича аниқ мажбуриятларни олди. Қўшма Штатлар Тайвань ороли билан фақат норасмий алоқаларни сақлаб қолишга ваъда берди. Шу билан бирга, сўнгги йилларда Вашингтоннинг орол билан алоқалари расмий характерга яқинлашди: Хитойнинг кескин норозилигига қарамай, ҳатто АҚШ Конгресси Вакиллар палатаси спикери оролга ташриф буюрди”, деди Хитой ТИВ расмий вакили. 

Бир кун аввал АҚШ Давлат котиби Энтони Блинкен Пекин Тайвань масаласига муносабатини ўзгартирганини айтган эди. Унинг фикрича, “статус-кво [Пекин учун] энди қабул қилиниши мумкин эмас”. У, шунингдек, АҚШ ўзини ҳимоя қилиш қобилиятини қўллаб-қувватлаш учун [АҚШ] Тайвань билан муносабатлар тўғрисидаги қонун бўйича Тайвань олдидаги мажбуриятларини бажаришга қатъий содиқлигини таъкидлади. 

Маълумот ўрнида, Тайвань 1949 йилда Чан Кайши  (1887-1975) бошчилигидаги гоминдан қўшинларининг қолдиқлари Хитой фуқаролар урушида мағлуб бўлиб, оролга қочиб кетганидан бери ўз маъмурияти томонидан бошқарилади. Ўшандан бери Тайвань коммунистлар ҳокимиятга келишидан олдин материкда мавжуд бўлган собиқ Хитой Республикаси байроғи ва бошқа атрибутларини сақлаб қолди. ХХРнинг аксарият давлатлар томонидан қўллаб-қувватланган расмий позициясига кўра, орол Хитой провинцияларидан бири ҳисобланади.

Қўшма Штатлар 1979 йилда Тайвань билан дипломатик алоқаларни узиб, ХХР билан яқинлашди. Вашингтон “ягона Хитой” сиёсатини тан олиш билан бирга, айни пайтда Тайбэй маъмурияти билан алоқаларни давом эттирмоқда ва оролга қурол етказиб бермоқда. 2-3 август кунлари АҚШ Конгресси Вакиллар палатаси спикери Нэнси Пелосининг оролга ташрифи ортидан Тайвань бўғози минтақасидаги кескинлик жиддий равишда авж олди, бу эса Пекиннинг кескин танқидига сабаб бўлди.