Халқаро бренд товарларини импорт қилувчилар реестри шакллантирилади 

Ўзбекистонда Халқаро брендлар товарларининг айрим турларини бренд эгалари ёки уларнинг ваколатли етказиб берувчилари билан тузилган тўғридан-тўғри шартнома асосида импорт қилувчилар реестрини шакллантириш ва юритиш тартиби тўғрисида низом тасдиқланди. Бу ҳукуматнинг 99-сонли қарорида назарда тутилган.

Қарор низомига кўра, реестрга кириш учун ариза берувчи Инвестициялар, саноат ва савдо вазирлигига ариза юборади.

Аризага, жумладан, қуйидаги ҳужжатлар илова қилинади: 

• ариза берувчи халқаро брендлар товарларининг айрим турларининг бренд эгалари ёки уларнинг ваколатли етказиб берувчилари эканлигини тасдиқловчи ҳужжатлар;
• маҳсулот етказиб бериш бўйича тўғридан-тўғри тузилган импорт шартномалари;
• товарларнинг сифати ёки хавфсизлигини тасдиқловчи ҳужжатлар;
• товарнинг келиб чиқиш мамлакати ва ишлаб чиқарувчиси ҳақида дастлабки маълумот.

Ариза қабул қилинган кундан бошлаб 20 иш кунида кўриб чиқилади. Ариза берувчини ва халқаро брендлар товарларининг Реестрга киритилганлиги тўғрисидаги сертификат 1 йил амал қилиш муддати билан берилади. 

Реестрга киритиш бўйича аризани кўриб чиқиш учун тўлов қиймати ҳар бир импорт шартнома суммасининг, қўшимча келишувлар бўйича – қўшимча келишув суммасининг 0,8 фоизи миқдорида ҳисобланиб, ушбу миқдорга қўшилган қиймат солиғи алоҳида қўшилган ҳолда ундирилади.

Сертификатни қайта расмийлаштириш учун базавий ҳисоблаш миқдорининг 5 баробари (1,5 млн сўм) миқдорида тўлов ундирилади.

Маълумот учун, реестер Давлат аҳамиятига молик бирон-бир соҳага оид рўйхат ҳисобланади.