Жамоатчилик Президентдан мухолифатчи Ибодўғлини озод қилишни сўрамоқда

Озарбайжон Апелляция суди мухолифатчи сиёсатчи Губад Ибодўғлини ҳибсда қолдирди. Адвокат ва яқинларининг сўзларига кўра, унинг соғлиғи оғир, у тўққиз килограмм вазн йўқотган. Фуқаролик жамияти вакиллари Президент Илҳом Алиевга мурожаат қилиб, Ибодўғлининг озод этилишига кўмаклашишни сўради. Аммо сиёсатчининг укаси фикрича, ҳозирда воқеаларнинг ривожланиши оптимизмга асос бермайди. 

7 август куни Апелляция суди олим, иқтисодчи ва мухолифатчи сиёсатчи Губад Ибодўғлининг қамоққа олиш чорасини уй қамоғига ўзгартириш тўғрисидаги даъвони рад этди. 

Адвокат Баҳруз Байрамовнинг айтишича, суд шикоятни "асоссиз" деб топган. Унинг сўзларига кўра, Ибодўғли судда иштирок этган ва ҳозиргача ўзини айбдор деб ҳисобламайди, аксинча, сиёсий фаолияти учун таъқиб қилинаётганини айтади. 

Қайд этилишича, Губад Ибодўғлининг соғлиғи қониқарли эмас. Бу ҳақда сиёсатчининг укаси Ғолиб Тўғрул маълум қилган. Унинг сўзларига кўра, акасининг аҳволи барқарор даражада оғирлигича қолмоқда. 

“Қон босими пасаймайди, юрак муаммолари сақланиб қолмоқда. Қондаги шакар миқдори тушмайди ва буйраклардаги асоратларни келтириб чиқаради. Энди унинг бўйнидаги лимфа тугунлари асаб тизимининг бузилиши туфайли катталашган. Шундай шароитлар мавжудки, соғлиқ нормал ҳолатда бўлолмайди. Ҳавонинг етишмаслиги, ҳаракатсизлик. Дори ичса ҳам соғлиғи ўз ҳолига қайтмайди. Энди биз унинг адвокати билан уни тиббий муассасага ўтказиш бўйича ҳаракатларимизни муҳокама қиламиз”, дейди Ғолиб Тўғрул.

Унинг айтишича, жамоатчилик вакиллари акасининг озод этилиши юзасидан давлат раҳбарига мурожаат қилган бўлсалар-да, ижобий натижага умид йўқ.  

“Ҳозирча воқеалар ривожи шуни кўрсатадики, ижобий натижа кутишга асос йўқ”, дейди у. 

Жорий йилнинг 5 август куни бир гуруҳ жамоат ва сиёсий арбоблар Президент Илҳом Алиевга ҳибсдаги профессор Губад Ибодўғлининг озод этилишига ёрдам беришни сўраб мурожаат қилган эди. 

Мурожаатни 141 киши – олимлар ва санъат намояндалари, журналистлар, сиёсатчилар, ҳуқуқ ҳимоячилари имзолаган. Улар Губад Ибодўғлининг ҳибсга олиниши мамлакат обрўсига путур етказишини таъкидлаб, давлат раҳбаридан унинг илмий фаолиятини инобатга олиб, озодликка чиқиши учун шароит яратишни сўраган. 

Аризачилардан бири, собиқ дипломат, профессор Насиб Насиблининг айтишича, Губад Ибодўғлига қўйилган айбловлар унга асосли эмас. 

“У мутафаккир, ижодкор, машҳур олим, уни озод қилиш керак, бундан табиийроқ нима бўлиши мумкин? Унинг жойи қамоқ эмас, озодлик. Жуда нотўғри амалиёт бор – одам дарҳол ҳибсга олинади ва қамоққа ташланади. Жиддий терговда, агар шубҳа туғилса, шахс мамлакатни тарк этмасин ва тергов ўтказилсин. Уни дарҳол қамашнинг маъноси йўқ. Унга қўйилган айбловларни ишонарли деб топмаяпман. У олим, қалбаки пул ишлаб чиқара олмайди, ФЕТО ҳаракати аъзоси бўла олмайди”, дейди Насибли. 

Нима бўлган эди? 

Жорий йилнинг 23 июль куни Озарбайжон Демократия ва фаровонлик ҳаракати раиси Губад Ибодўғли Уюшган жиноятчиликка қарши кураш бош бошқармаси ходимлари томонидан қўлга олинган. Унга нисбатан Жиноят кодексининг 204.3.1-моддаси (уюшган гуруҳ томонидан қалбаки пул ёки қимматли қоғозларни тайёрлаш, олиш ёки сотиш) бўйича айблов эълон қилинди. Ички ишлар вазирлиги тарқатган маълумотларга кўра, ФЕТО (Туркияда террорчи деб эълон қилинган ташкилот, раҳбари Фатҳуллоҳ Гулен АҚШнинг Пенсилвания штатида яшовчи) билан боғлиқ махсус операция давомида қўлга олинган беш кишидан бири Ибодўғли билан алоқалари бўлган ва бу унинг ҳам жиноий жавобгарликка тортилишига олиб келган. 

Ибодўғлининг ишхонаси, квартираси ва дачаларида тинтувлар ўтказилган. 24 июль куни Баку шаҳри Нариманов туман суди мухолифатчи сиёсатчини 3 ой 26 кунга ҳибсга олишга ҳукм қилди. 

Ибодўғли қўйилган айбловларни тан олмаган ва ҳибсга олинишини сиёсий фаолият билан боғламоқда.

Қатор Ғарб давлатларининг элчихоналари Озарбайжон ҳукуматини Ибодўғли ҳуқуқларини таъминлаш ва уни озод қилишга чақирди.

Озарбайжон парламентида Ибодўғлининг партияси вакиллик қилмайди,  бу мамлакатда мухолифат қаттиқ бостирилган. 

Март ойида Қўшма Штатлар Президент Илҳом Алиев томонидан имзоланган сиёсий партиялар тўғрисидаги қонундан хавотирда эканини айтиб, Озарбайжонни “асосий эркинликларни, жумладан, уюшмалар эркинлигини ҳурмат қилишга” чақирганди. 

“The Washington Post” газетаси таҳририятида Ибодўғлини ҳимоя қилиб, Озарбайжон ҳукуматидан уни зудлик билан озод қилишни талаб қилди. 

“Губод Ибодўғли иқтисодчи сифатида кўпинча ўзи ватани Озарбайжон ва унинг нефть бойликларини танқид қилади. Нега нефть бойликлари мамлакатда фаровонлик ва демократияга етакламади, деб ҳақли равишда савол берди ва Президент Илҳом Алиев даврини коррупциялашган ва клептократия деб атади. Ҳозир жаноб Алиев жавоб зарбаларини бермоқда”, дейилади мақолада. 

Материалда, шунингдек, сиёсатчининг ҳибсга олинишининг асл сабаби катта эҳтимол билан Буюк Британияда озарбайжонлик мутахассисларни тайёрлаш учун Озарбайжон ёшлар таълим жамғармасининг ташкил этилиши билан боғлиқлиги таъкидланган. Ибодўғли уни молиялаштириш учун “порахўр Озарбайжон амалдорларининг маблағларини” мусодара қилиш ташаббуси билан чиққан эди. 

“The Washington Post” газетасининг ёзишича, 2012 йилдан 2014 йилгача Озарбайжоннинг ҳукмрон элитаси вакиллари Европа сиёсатчиларига пора бериш, ҳашаматли буюмлар сотиб олиш, пул ювиш ва “Озарбайжонча ювиш” деб аталадиган бошқа манфаатларга эга бўлиш учун яширин пул жамғармасидан фойдаланганлар. Бу уюшган жиноятчилик ва коррупция ҳақида хабар бериш лойиҳасида ишлайдиган журналистлар консорсиуми томонидан фош қилинган.

Халқаро Демократия Ҳаракати Ибодўғлини қўллаб-қувватловчи баёнот чиқариб, унинг зудлик билан озод этилиши ҳақидаги кучайиб бораётган халқаро чақирувга қўшилишини қайд этди. 

“Доктор Ибодўғлига қўйилган айбловлар ўта хаёлпараст ва унинг ҳибсга олиниши уни расмийларнинг фикрича, режимнинг клептократик соҳаларига таҳдид солаётган фаолиятини тўхтатишга мажбурлаш, шунингдек, Озарбайжоннинг аллақачон заиф фуқаролик жамияти ва мустақил оммавий ахборот воситаларига таҳдидли сигнал бериш мақсадида қилинган”, дейилади баёнотда.