Karni Trampga Kanada sotilmasligini aytdi (video)

Kanada Bosh vaziri Mark Karni kecha, 6 may kuni Vashingtonda AQSH Prezidenti Donald Tramp bilan uchrashuvda uning mamlakati sotilmasligini aytdi. Bu haqda u Oval kabinetda jurnalistlar Trampning Kanadani AQSHga qo‘shib olmoqchi ekani haqidagi takroriy bayonotlariga izoh berishni so‘raganida so‘z ochdi.

Qisqa salom-alikdan so‘ng, Tramp Kanadani Amerikaning 51-shtatiga aylantirish niyatidan voz kechmayotganini aytdi.

“Menimcha, bu Kanada uchun ancha yaxshi, ammo kimdir buni muhokama qilmoqchi bo‘lmasa, biz buni muhokama qilmaymiz.

O‘ylaymanki, bu ajoyib nikoh bo‘lardi, chunki ikki davlat juda yaxshi munosabatda”, dedi u Oval ofisda jurnalistlarning savollariga javob berar ekan.

Kanada Bosh vaziri bunga javoban Tramp biznes tajribasidan “ba’zi joylar borki, ular hech qachon sotilmaydi” deb bilishini aytdi.

“Men so‘nggi oylarda saylovoldi kampaniyasida Kanada egalari [saylovchilar] bilan uchrashdim va sizga ayta olamanki, u sotilmaydi, u hech qachon sotilmaydi”, dedi Karni.

“Hech qachon hech qachon demang”, deb javob berdi Tramp.

“Kanadaning pozitsiyasi hech qachon o‘zgarmaydi”, deb javob qaytardi Karni.

Uchrashuvni kuzatayotgan jurnalistlarning ta’kidlashicha, “51-shtat” muhokamasi bo‘lgan epizodda Mark Karni ishonchli, ammo vazminlik bilan javob qaytargan va vaziyatni keskinlashtirmagan. Buning o‘rniga, u Trampni hamkorlik haqida munozaraga jalb qilishga harakat qildi. Uning so‘zlariga ko‘ra, hamkorlikda ish olib borish har ikki davlat uchun katta imkoniyatlar ochishi mumkin.

Qo‘shma Shtatlar rahbari bir necha bor ko‘plab kanadaliklar o‘z mamlakatlari AQSHning 51-shtati bo‘lishi tarafdori, degan fikrni bildirgan. Uning fikricha, bunday ittifoq Kanadaga iqtisodiy barqarorlik olib keladi va uni tashqi tahdidlardan, xususan, Rossiya va Xitoydan keladigan xavflardan himoya qiladi.

Karni esa uning mamlakati hech qachon, hech qanday shaklda Qo‘shma Shtatlar tarkibiga kirmasligini bir necha bor ta’kidlagan.