Қўшниларимизга қанча сув керак бўлса, шунча берамиз – Жапаров

Қирғизистон Президенти Садир Жапаров жорий йилда сув тақчиллигини бартараф этиш учун янги суткалик (БСР) ва ўн кунлик (БДР) тартибга солиш ҳавзалари қурилишини, бу эса қўшни давлатларни ҳам сув билан таъминлашини айтди. Бу ҳақда у “Кабар” ахборот агентлигига берган интервьюсида сўз очди.

“Сувимиз етишмаса, нега қўшнимизга сув беришни тўхтатмаймиз?” деганлар ҳам бор, агар биз БСР ва БДРда сув йиғиб олсак, қуйи оқимда яшайдиганлар қийналиб қолмайдими?” деб сўрайди журналист Президентдан.

Садир Жапаровнинг айтишича, ҳозирда мавжуд ҳовузларда етарлича сув тўпланмаяпти.

"Сув етарли даражада тўпланмагани учун фермерлар суғориш мавсумида сув танқислигини бошдан кечирди. Бу йил биз ҳамма нарсани тозалаяпмиз. Бундан ташқари, бутун мамлакат бўйлаб янги БСР ва БДРларни қуриш бўйича кўрсатмалар бердим. Бу БСР ва БДРлар биринчи навбатда қуйи оқимда яшовчи қўшниларимиз учун фойдалидир. Агар қишда БСР ва БДРда эриган сувни йиғиб олсак, баҳордан дарё суви бутунлай қўшниларга оқиб ўтади. Яъни улар аввалгидан ҳам кўпроқ сув олади. Суғориш мавсумида фермерларимиз БСР ва БДР сувларидан, қўшниларимиз эса оқар сувдан фойдаланишлари мумкин бўлади”, дейди Қирғизистон раҳбари.

Унинг сўзларига кўра, Қирғизистон ҳукумати қишда оқадиган сувдан максимал фойда олишга интилади.

“Қўшниларимизга қанча сув керак бўлса, шунча сув берамиз”, дея таъкидлайди Жапаров.

Мисол тариқасида у қурилаётган Қамбарота ГЭС-1 ни келтирди. Қирғизистон раҳбарининг сўзларига кўра, ундан қўшни давлатлар сув ресурслари кўринишида наф кўради.

"Биз фақат электр энергиясидан фойдаланамиз. Норин дарёси сувининг бор-йўғи 1 фоизини суғориш ва ичимлик суви учун фойдаланамиз. 99 фоизи Ўзбекистон ва Қозоғистонга кетади. Қамбарота ГЭС-1 қуриб битказилгач, ундан фойдаланиш имконига эга бўламиз. Биз ундан қишда электр энергияси ишлаб чиқариш, суғориш мавсумида эса қўшниларга Тўқтўғул ГЭСида тўпланган сувни етарли миқдорда етказиб бериш учун фойдаланишимиз мумкин. Ҳозирда қишда электр энергияси ишлаб чиқариш учун Тўқтўғул ГЭСидан фойдаланамиз, лекин ёзда уни тўхтатишга тўғри келади. Келаси қиш учун сувни тежамасак, электрсиз қоламиз. Бу муаммоларни ҳал қилиш устида ишлаяпмиз. Биз нафақат ўзимизни, балки қўшниларимизни ҳам ўйлаймиз, чунки қўшничилигимиз абадий, умумий муаммоларни бирга ўйлашимиз керак. Биз дарёнинг бошида турибмиз ва сув бермаймиз, деб баҳслашиш бемаъниликдир. Барчамиз қардош халқмиз, абадий қўшнимиз ва кўп жиҳатдан бир-биримизга боғлиқмиз. Мен ҳамма нарсани санаб ўтмайман, буни одамларнинг ўзлари жуда яхши билади”, дея қўшимча қилган Қирғизистон Президенти.