Қурилиш вазирлиги Андижонда ноқонуний қурилаётган бинолар ҳақида маълумот берди

Жамият 3089
image
-

Қурилиш вазирлиги Андижон вилоятида амалдаги қонунчиликни бузган ҳолда барпо этилаётган иншоотлар ҳақида маълумот берди. таъкидланишича, аниқланган муаммолар юзасидан ҳудудий инспекция томонидан уларни бартараф этиш бўйича чора-тадбирлар белгиланди.

1. Андижон шаҳар ҳокимининг 2019 йил 18 октябрдаги 798-қ сонли қарори билан Андижон шаҳри Машраб кўчасида 7 қаватли (1-қаватида савдо ва маиший хизмат кўрсатиш шаҳобчаси, юқори қаватлари турар-жой) бино қурилишига рухсат берилган. Белгиланган тартибда Ўзбекистон Республикаси Вазирлар Маҳкамасининг 2018 йил 18 майдаги 370-сонли қарори талабларига асосан қурилиш объектига тегишли бўлган шаҳарсозлик ҳужжатлари тўлиқ расмийлаштирилган.

Бироқ, Республика ишчи комиссияси текширувида лойиҳачи “Андижонфуқаролойиҳа” МЧЖ томонидан Шаҳарсозлик норма ва қоидалари талабларининг бажарилишида камчиликларга йўл қўйилгани аниқланди. Уларни бартараф этиш бўйича 2021 йилда 2-7/41-сонли ёзма кўрсатма берилган. Берилган ёзма кўрсатмага “Андижонфуқаролойиҳа” МЧЖ томонидан ўз вақтида жавоб берилмаганлиги учун инспекция 35-сонли хат асосида Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштириб, Жиноят ишлари бўйича Андижон шаҳар судига юборган. 

2. Избоскан тумани ҳокимининг 2019 йил 25 сентябрдаги 2915-қ сонли қарори билан Избоскан тумани Пойтуг шаҳри Мирзо Улуғбек МФЙ Янги бозор кўчаси ҳудудида кўп қаватли турар-жой биноси қурилишига рухсат берилган. Қурилиш ишлари эса “Иззатбек савдо капитал” МЧЖ томонидан олиб борилмоқда.

Ушбу объект бўйича белгиланган тартибда шаҳарсозлик ҳужжатлари тўлиқ расмийлаштирилган. Республика ишчи комиссияси текширувида “Иззатбек савдо капитал” МЧЖ мансабдор шахсига Шаҳарсозлик нормалари ва қоидалари талабларининг бажарилишида аниқланган камчиликларни бартараф қилиш бўйича жорий йилнинг 11 февраль куни 03/03-1-сонли ёзма кўрсатма берилган.

Ёзма кўрсатма бўйича ташкилот масъул шахси томонидан ўз вақтида қурилишдаги камчиликлар бартараф этилмагани учун Маъмурий ҳуқуқбузарлик тўғрисида 32-сонли баённома ва 32-сонли хат билан Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Избоскан тумани судига юборилган.

3. Андижон шаҳар ҳокимининг 2018 йил 6 августдаги 860-қ сонли қарори билан Андижон шаҳар, Фитрат кўчасида 6 қаватли (1-қаватида савдо ва маиший хизмат кўрсатиш шаҳобчаси, юқори қаватлари турар-жой) бино қурилишига рухсат берилган.

Ушбу объект бўйича ҳам шаҳарсозлик ҳужжатлари тўлиқ расмийлаштирилган. Республика ишчи комиссияси текширувида аниқланган камчиликлар бўйича эса ушбу объектнинг иш юрутувчисига Шаҳарсозлик нормалари ва қоидалари талабларининг бажарилишида аниқланган камчиликларни бартараф қилиш бўйича 09.02.2021 йилда 14-2/006-сонли ёзма кўрсатма берилган.

Берилган ёзма кўрсатма бўйича ўз вақтида қурилишдаги камчиликларни бартараф этиб, чора-тадбирларга белгиланган вақтда жавоб берилмаганлиги учун инспекция томонидан маъмурий ҳуқуқбузарлик тўғрисида 36-сонли баённома ва жорий йил 2 март куни 36-сонли хат асосида Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Андижон шаҳар судига юборилган.

4. Балиқчи тумани ҳокимининг ўтган йил 13 апрелдаги 140-қ сонли қарори билан Балиқчи туман, “Оққўрғон” МФЙ ҳудудида 9 қаватли (1-қаватлари “Савдо ва маиший хизмат кўрсатиш” шаҳобчалари, юқори қаватлари турар-жой) объект қуришга рухсат берилган. Қурилиш пудрат ишларини “Стандарт савдо пласт” МЧЖ олиб бормоқда. Ушбу турар жой бўйича белгиланган тартибда шаҳарсозлик ҳужжатлари тўлиқ расмийлаштирилган. Республика ишчи комиссияси текширувида аниқланган камчиликлар бўйича эса уларни бартараф қилиш юзасидан 12.02.2021 йилда 02-8/7-сонли ёзма кўрсатма берилган.

Берилган ёзма кўрсатма бўйича масъул шахс томонидан ўз вақтида қурилишдаги камчиликлар бартараф этилмагани учун инспекция томонидан Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Балиқчи тумани судига юборилиши учун ҳужжатлар тайёрланди. 

5. Андижон шаҳар ҳокимининг ўтган йил 23 апрелдаги 203-қ сонли қарори билан Андижон шаҳар “Яйилма” МФЙ, 4-қаватли турар-жойлар ҳудудида “And Ravnaq Construction” МЧЖга 5 қаватли турар-жой биноси қурилишига рухсат берилган. 

Ўзбекистон Республикаси Вазирлар Маҳкамасининг 18.05.2018 йилдаги №370-сонли қарори талабларига асосан қурилиш объектига тегишли бўлган шаҳарсозлик ҳужжатларини расмийлаштирилишида бузилишлар мавжуд яъни объект Андижон шаҳар Бош режасига киритилмаган ҳамда лойиҳа “Архитектура-шаҳарсозлик кенгаши” томонидан кўриб чиқилмаган, баён олинмаган.

Республика ишчи комиссияси текширувида аниқланган камчиликлар бўйича лойиҳа муаллифи "Меъмор арч консепт" МЧЖга Шаҳарсозлик нормалари ва қоидалари талабларининг бажарилишида аниқланган камчиликларни бартараф қилиш бўйича 02.02.2021 йилда 2-7/2-м-сонли ёзма кўрсатма берилган. 

Берилган ёзма кўрсатмага лойиҳа муаллифи "Меъмор арч консепт" МЧЖ директори томонидан ўз вақтида жавоб берилмаганлиги учун инспекция томонидан маъмурий ҳуқуқбузарлик тўғрисида 34-сонли баённома расмийлаштирилган ва 34-сонли хат билан Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Андижон шаҳар судига юборилган. 

6. Избоскан тумани ҳокимининг ўтган йил 8 июндаги 249-қ сонли қарори билан Избоскан тумани, “Даминбойчек” МФЙ ҳудудида 2 дона 5 қаватли турар-жой бинолари қурилишига ва лойиҳа-смета ҳужжатларини амалга оширишга рухсат берилган. Қурилиш пудрат ишлари эса “MIDX” МЧЖ томонидан амалга оширилмоқда.

1

Ушбу объект бўйича белгиланган тартибда шаҳарсозлик ҳужжатлари тўлиқ расмийлаштирилган. Республика ишчи комиссияси текширувида қурилишнинг иш юрутувчисига Шаҳарсозлик нормалари ва қоидалари талабларининг бажарилишида аниқланган камчиликларни бартараф қилиш бўйича жорий йил 12 февралда 4863-сонли кўрсатма берилган. Берилган ёзма кўрсатма бўйича ўз вақтида қурилишдаги камчиликлар бартараф этилмагани учун инспекция томонидан Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Избоскан тумани судига юборилган.

7. Хўжаобод тумани ҳокимининг 2019 йил 30 декабрдаги 1725-қ сонли қарори билан Хўжаобод тумани, Иттифоқ массивидаги 5-7 қаватли турар-жой биноси қурилишига ер майдони ажратиб берилган.

Ушбу объект бўйича белгиланган тартибда шаҳарсозлик ҳужжатлари тўлиқ расмийлаштирилган. Қурилиш пудрат ишлари “Барака Файз ихтисослашган қурилиш” МЧЖ томонидан олиб борилмоқда. Ушбу қурилишнинг иш юритувчисига аниқланган камчиликларни бартараф қилиш бўйича инспекция томонидан жорий йил 12 февралда 02-8/4-сонли ёзма кўрсатма берилган. 

Берилган ёзма кўрсатма бўйича ўз вақтида қурилишдаги камчиликлар бартараф этилмагани боис Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Хўжаобод тумани судига юбориш учун тайёрланган. 

8. Андижон шаҳар Бухоро кўчасида 9 қаватли, 1-қаватини савдо ва маиший хизмат кўрсатиш шаҳобчаси, юқори қаватлари 101 хонадонли турар-жой биносининг қурилиш ишлари "Смарт панель ҳамкор" МЧЖ томонидан амалга оширилган.

Белгиланган тартибда Ўзбекистон Республикаси Вазирлар Маҳкамасининг 18.05.2018 йилдаги №370-сонли қарори талабларига асосан шаҳарсозлик ҳужжатлари тўлиқ расмийлаштирилган. Ушбу қурилишнинг иш юритувчисига Шаҳарсозлик нормалари ва қоидалари талабларининг бажарилишида аниқланган камчиликларни бартараф қилиш бўйича жорий йил 12 февралда 14-02/009-сонли ёзма кўрсатма берилган. 

Масъул шахс томонидан берилган ёзма кўрсатма бўйича ўз вақтида қурилишдаги камчиликлар бартараф этилмагани учун инспекция томонидан жорий йил 2 мартда Ўзбекистон Республикаси “Маъмурий жавобгарлик тўғрисида”ги Кодекснинг 99-моддаси 1-қисми билан ўрнатилган тартибда ҳужжатлар тўплами расмийлаштирилиб, Жиноят ишлари бўйича Хўжаобод тумани судига топширилган.

Суннатилла Абдуллаев
Мақолага баҳо беринг
Баҳолаганлар: 38
Рейтинг: 3
t
×