Qozog‘istonda Kalashnikov avtomatlarini ishlab chiqarish yo‘lga qo‘yiladi

Qozog‘istonda Kalashnikov avtomatlarini ishlab chiqarish yo‘lga qo‘yiladi. Rossiyada o‘tayotgan MAKS-2021 avia-forumida Qozog‘iston va Rossiya ishlab chiqaruvchilari shunday kelishuvga erishdi.

Kecha, 21 iyul kuni “Tinis” zavodi Qozog‘iston hududida Kalashnikov avtomatlarining litsenzion yig‘ilishini tashkil etish to‘g‘risida bitim imzolagan. Bu haqda Qozog‘istonning Sanoat va infratuzilmani rivojlantirish vazirligi xabar berdi.

Loyiha operatori – “Kazaxstan injiniring” milliy kompaniyasi. Qozog‘istonda AK-12 va AK-15 kabi zamonaviy o‘qotar qurollarni ishlab chiqarish joriy yil avgust oyidan boshlanadi.

Bundan tashqari, “Kirov zavodi” AJ, Rossiyaning “Prima” zavodi va “405 samolyotlarni ta’mirlash zavodi” AJ o‘rtasida Qozog‘istonda aviatsiya uskunalari uchun radioaloqa uskunalarini ishlab chiqarishni mahalliylashtirish to‘g‘risida uch tomonlama bitim imzolandi.