Қозоғистон икки фуқароликни яширганлик учун жазони кучайтирмоқчи

Қозоғистон ҳуқуқ-тартибот идоралари икки фуқароликни қасддан яширганлик учун жазони кучайтириш учун қонунчиликка ўзгартириш киритмоқчи. Бу ҳақда бугун, 20 февраль куни Қозоғистон Ички ишлар вазирлиги матбуот хизмати хабар берди. 

“Жорий йилда икки фуқаролик фактларининг олдини олиш мақсадида қонун ҳужжатларига бошқа фуқароликни қасддан яширганлик учун жавобгарликни кучайтиришга қаратилган ўзгартишлар киритиш кўзда тутилган. Бошқа фуқароликни қабул қилишда оқибатларга олиб келмаслик учун хорижий мамлакатларга кетган ва бошқа фуқароликни қабул қилган Қозоғистоннинг собиқ фуқаролари 30 кун ичида Қозоғистоннинг консуллик муассасасига фуқаролигини йўқотганлигини қайд этиш учун мурожаат қилишлари керак”, дейилади хабарда. 

Ички ишлар вазирлиги улар қонун нормаларини аниқ қандай кучайтиришни режалаштираётганига аниқлик киритмади. 

“Ўтган йили икки фуқаролик учун 841 нафар шахс маъмурий жавобгарликка тортилган бўлиб, улардан 138 нафари суд қарорлари билан республикадан чиқариб юборилган, қолганлари жаримага тортилган. Сўнгги беш йилда фуқаролик тўғрисидаги қонун ҳужжатларини бузганлик учун 3,5 минг киши жавобгарликка тортилди, улардан 3 мингдан ортиғи жаримага тортилди, 473 нафари мамлакатдан чиқариб юборилди. Қозоғистон фуқаролиги ҳамма учун бекор қилинди”, дея тушунтирди матбуот хизмати. 

Ички ишлар вазирлиги маълумотларига кўра, ўтган йили 22 мингдан ортиқ киши Қозоғистон фуқаролигини олган. Улардан Президент фармони билан 1,4 минг киши фуқароликка, 17,5 минг нафардан ортиғи канда (қозоқ миллатига мансуб ватандошлар) сифатида фуқароликка, Қозоғистон, Беларусь, Қирғизистон ва Россия ўртасида фуқароликка қабул қилишнинг соддалаштирилган тартиби тўғрисидаги келишувга асосан 1,3 минг киши, турмуш қурган аёлнинг фуқаролиги тўғрисидаги конвенцияга мувофиқ – 1, 8 минг киши қабул қилинди.

Маълумот учун, Қозоғистон икки фуқароликни тан олмайди. Қозоғистон фуқаролигини йўқотган шахс томонидан Қозоғистон фуқаросининг паспорти ёки шахсий гувоҳномасидан фойдаланганлик учун маъмурий жавобгарлик назарда тутилади. Икки фуқароликка эгалик фактини яширганлик учун 200 ойлик ҳисоб-китоб кўрсаткичи (1 ойлик ҳисоб кўрсаткичи 3450 тенге ёки 7,7 АҚШ доллари) миқдорида жарима солинади ёки республикадан чиқариб юборилади.