Қирғизистонга Ўзбекистондан ноқонуний гуруч олиб борилди

Қирғизистон Республикасида Ўзбекистондан контрабанда йўллар орқали олиб борилган тахминан 6–7 тонна гуруч партияси ушлаб қолинди. Бу ҳақда “24.kg” хабар берди.

Аниқланишича, узоқ вақт давомида Қадамжой туманида Қирғизистон ва Ўзбекистон фуқароларидан иборат жиноий гуруҳ фаолият юритиб келган. Улар божхона, солиқ ва чегара қонунчилигини бузган ҳолда, “Фарғона – Чон-Қора – Қадамжой” йўналиши бўйлаб турли истеъмол моллари контрабандасини амалга оширган.

Қўшни давлат фуқаролари Ўзбекистон ҳудудида гуручни катта ҳажмларда харид қилган. Сўнгра олдиндан ишлаб чиқилган жиноий схема бўйича ушбу гуруч партияси Қадамжой туманининг транзит ҳудуди орқали Чўн-Қора (Ўзбекистон) анклавига етказилган.

Кейинчалик эса мазкур товар анклав ҳудудидан ноқонуний тарзда чиқарилиб, Қирғизистон фуқаросига тегишли бўлган Ак-Турпак қишлоқ округида тушириб қолдирилган. Шундан сўнг, гуруч Қирғизистон ҳудудида сотилган.

Ҳозирда контрабандага алоқадор Қирғизистон фуқароси М.Н.А. тергов остида.

Эслатиб ўтамиз, аввалроқ Қирғизистон Миллий хавфсизлик давлат қўмитаси Бишкекдаги савдо марказларида терактлар уюштириш билан таҳдид қилган шахсни қўлга олганди.