Qirg‘izistonda ekstremistlarning yuqori lavozimli rahbari ushlandi (video)

Qirg‘izistonning Jalolobod viloyatida Milliy xavfsizlik davlat qo‘mitasi (MXDQ) xodimlari taqiqlangan “Hizb ut-Tahrir” diniy-ekstremistik tashkiloti rahbarlarini zararsizlantirish bo‘yicha tezkor-qidiruv tadbirlarini o‘tkazdi. Bu haqda qo‘mita matbuot markazi xabar berdi.

Operatsiya davomida maxsus xizmatlar tashkilotning Suzoq tumani bo‘yicha mas’uli (rahbari) lavozimida bo‘lgan nufuzli yetakchisini qo‘lga olgan. Tergov ma’lumotlariga ko‘ra, qo‘lga olingan shaxs tashkilotning respublika rahbariyati va “Hizb ut-Tahrir” tizimining jahondagi vakillari bilan bevosita aloqada bo‘lgan.

Bir necha yil davomida u mahalliy aholi orasida ekstremistik mafkurani faol targ‘ib qilgan, yangi a’zolarni yollab, taqiqlangan materiallarni tarqatgan. Shuningdek, u jinoiy faoliyatni moliyalashtirish uchun oddiy a’zolardan pul yig‘ishni tashkil qilgan.

Sud qarori bilan qo‘lga olingan shaxs MXDQ tergov izolyatoriga joylashtirilgan. Tezkor xodimlar tashkilotning boshqa tarkibiy bo‘linmalarini aniqlamoqda va yetakchining jinoiy aloqalarini fosh etmoqda.

Eslatib o‘tamiz, avvalroq Buxoro viloyatining Buxoro shahrida Suriya davlatidagi “Tavhid va jihod katibasi” xalqaro terroristik tashkilotiga aloqasi bo‘lgan ota va o‘g‘il aniqlangandi.