Қирғизистонда “Барселона” академияси очилди (фоторепортаж)

Кеча, 29 август куни Қирғизистоннинг Жалолобод шаҳрида “Барселона” футбол академияси очилди. Шахсан давлат раҳбари Садир Жапаров янги академияни очиб берди. Бу ҳақда Президент матбуот хизмати хабар берди.

Маросимда Испаниянинг “Барселона” футбол клуби президенти Жоан Лапорта ва клуб вакиллари ҳам иштирок этди. Янги очилган Футбол академияси бутун Қирғизистон бўйлаб иқтидорларни излаш ва тарбиялаш мақсадида ташкил этилган “Барселона”нинг 29-академиясидир. 

Академия 200 ўринга мўлжалланган бўлиб, бу ерда истиқомат қиладиган ва таҳсил оладиган ёш футболчиларга хорижлик мутахассислар ҳам сабоқ беради. Бундан ташқари, ушбу академияда 2-3 мингга яқин бола спорт секцияларига қатнайди. Қирғизистондаги “Барселона” футбол академияси Испания клуби талабларига тўлиқ жавоб беради.

“Футбол - миллионлаб инсонлар қалбини тўлқинлантириб, ўзига хос туйғуларни уйғотадиган ҳаяжонли ўйин. Шунинг учун ҳам у дунёда биринчи рақамли спорт тури ҳисобланади. Бутун дунё қатори Қирғизистонда ҳам футболнинг нуфузи жуда баланд. Ҳозир юртимизнинг юз минглаб мухлислари, барча қирғизистонликлар ана шундай қувончли воқеанинг гувоҳи бўлмоқда. Барчангизни Марказий Осиёда илк бор “Барселона” клуби футбол академиясининг тантанали очилиши билан чин қалбимдан табриклашга ижозат бергайсиз. Футболчиларимизнинг сўнгги йилларда қўлга киритаётган ютуқларидан, таъсирчан ўйин кўрсатган жамоамизнинг ғалабаларидан мамнунмиз. Масалан, 2019 йилги Осиё Кубоги Қирғизистон ва Қирғизистон футболи учун тарихий воқеа бўлди. Мамлакатимиз терма жамоаси ажойиб ўйин кўрсатиб, қирғиз чавандозларининг матонати ва иродасини бутун дунёга намойиш этди. Ҳурматли қирғизистонликлар, янги Футбол академияси очилиши билан табриклайман. Бу мамлакатимизнинг ёруғ келажак сари йўлини давом эттирадиган янги муваффақиятларнинг бошланиши бўлсин!”, дейди Садир Жапаров.

Таъкидлаш жоиз, бугун, 30 август куни Жалолободдаги “Қурманбек” стадионида “Барселона” афсоналари ва Марказий Осиё юлдузлари футбол ўйини бўлиб ўтди. Баҳсда мамлакат Президенти Садир Жапаров ҳам иштирок этиши кутилмоқда.