Qidiruvdagi shaxs Toshkentda ushlandi

Toshkent shahrining Chilonzor tumanida xizmat olib borayotgan YPX inspektori tomonidan qidiruvda bo‘lgan shaxs qo‘lga olindi. Bu haqda shahar IIBB Yo‘l harakati xavfsizligi boshqarmasi xabar qildi.

Qayd etilishicha, bugun, 13 oktyabr kuni soat 01:20 larda Toshkent shahar Chilonzor tumanida xizmat olib borayotgan Toshkent shahar IIBB YHXB YPXB 4-batalon YPX inspektori serjant D. Shomurodov tomonidan Qatortol ko‘chasida Damas rusumli avtomashina to‘xtatilgan. Hujjatlari tekshirilishi davomida haydovchi – 2001 yilda tug‘ilgan M.O.ning o‘zini tutishi xodimlarda shubha uyg‘otgan.

Uning ma’lumotlari planshet moslamasi yordamida, maxsus dastur orqali tekshirilganda, haydovchi O‘zbekiston Respublikasi Jinoyat kodeksining 168-moddasi (Firibgarlik) 3-qismida nazarda tutilgan jinoyatni sodir etganlikda gumonlanib, qidiruvga berilgani ma’lum bo‘lgan.

Tegishli hujjatlar rasmiylashtirilib, fuqaro M.O. Chilonzor tumani IIO FMBga topshirilgan.

Eslatib o‘tamiz, avvalroq jinoyat sodir etgan va qidiruvda bo‘lgan 3 nafar O‘zbekiston fuqarosi Turkiyada ushlangandi.