Qatarda Isroil va HAMAS o‘rtasidagi “uzoq muddatli sulh” bo‘yicha muzokara o‘tkazildi

Qatarda Isroil va HAMAS o‘rtasidagi yangi "uzoq muddatli sulh" kelishuvini muhokama qilish bo‘yicha muzokaralar bo‘lib o‘tdi. Bu haqda Isroil davlat televideniyesi xabar berdi. 

Aytilishicha, Dohada bo‘lib o‘tgan yig‘ilishda Qatar Bosh vaziri va Tashqi ishlar vaziri Muhammad bin Abdurahmon Ol Soniy, Isroilning “Mossad” Tashqi razvedka xizmati rahbari David Barnea, AQSH Markaziy razvedka boshqarmasi direktori Uilyam Byorns va Misr razvedka xizmati rahbari Abbos Komil ishtirok etgan.

Uchrashuvda “uzoq muddatli sulh” va Tel-Aviv tomonidan falastinlik mahbuslarni ozod qilinishi evaziga barcha isroillik mahbuslarni, shu jumladan erkaklar va harbiy xizmatchilarni qo‘yib yuborish muhokama qilingan.

“Mossad” rahbari Barneaning Doha muzokaralari tafsilotlari haqida Isroil Bosh vaziri Binyamin Netanyaxuga ma’lumot bergani qayd etilgan.

HAMAS yangi kelishuvning umumiy qoidalarini ma’qullagani va “to‘liq sulh” tuzish istagini bildirgani xabar qilingan, biroq Isroil buni allaqachon rad etgan.

Eslatib o‘tamiz, G‘azoda o‘t ochishni vaqtinchalik to‘xtatish bo‘yicha kelishuv 24 noyabr kuni ertalab kuchga kirgandi. Dastlabki kelishuvga ko‘ra, 4 kun davomida HAMAS garovdagi 50 nafar isroillikni, Isroil esa qamoqdagi 150 nafar falastinlikni ozod qilishi kerak edi. 27 noyabr kuni tomonlar sulhni yana ikki kunga uzaytirishga kelishib olganini ma’lum qildi. Bu vaqt ichida HAMAS garovdagilar orasidan yana 20 nafar ayol va bolani ozod qilishi kerak.