Қашқадарёда мудҳиш ЙТҲ. 4 киши вафот этди

Бугун, 28 декабрь куни соат 14:30 атрофида Қашқадарё вилояти, Чироқчи туманида мудҳиш ЙТҲ содир бўлди. Ҳалокат натижасида автомобилда бўлган 4 киши вафот этган. Бу ҳақда ИИВ ҳузуридаги Тергов департаменти хабар бермоқда. 

Гап шундаки, 20 ёшли Ф.Ж. бошқарувидаги Nexia-2 русумли автомашинасида Чироқчи тумани Кўктош маҳалласидан ўтувчи “4Р-84 Яккабоғ-Чироқчи” йўли бўйлаб ҳаракатланиб келиб ўзидан олдинда кетаётган автомашинани қувиб ўтиш учун қарама-қарши йўналишга чиққан вақтида йўлнинг 35 кмда, 41 ёшли И.Н. бошқарувидаги Камаз русумли юк автомашинаси билан тўқнашиб кетиши оқибатида йўл-транспорт ҳодисаси содир қилган.

Натижада Nexia-2 русумли автомашина ҳайдовчиси Ф.Ж. ва 3 нафар йўловчилар ҳодиса содир бўлган жойда вафот этган.

Ҳолат юзасидан Чироқчи тумани ИИБ ҳузуридаги Тергов бўлими томонидан Жиноят кодексининг 266-моддаси 3-қисми “а” банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, дастлабки тергов ҳаракатлари олиб борилмоқда.