Июль ойида Ўзбекистонда ҳаво ҳарорати меъёридан юқори бўлади

Ўзбекистонда жорий йилнинг июль ойида ҳаво ҳарорати меъёридан юқори бўлиши, айрим ҳудудларда эса 45 даражагача етиши кутилмоқда. Бу ҳақда Ўзгидромет эълон қилган об-ҳаво прогнози маълумотида келтирилган.

Унга кўра, июль ойининг дастлабки беш кунида кундузги ҳарорат 30–35 даража, жанубда 36–39 даража атрофида бўлади. Шундан сўнг ҳарорат аста-секин кўтарилиб, ойнинг биринчи ўн кунлиги охирига бориб 37–40 даражага, жанубий ҳудудларда эса 41–43 даражагача етади.

Ойнинг қолган қисмида кундузги ҳарорат асосан 33–43 даража оралиғида бўлиши, республиканинг шимолий, чўл ва жанубий ҳудудларининг айрим жойларида эса 45 даражагача кўтарилиши мумкин. Кечалари ҳаво ҳарорати 20–25 даража, жанубда 25–27 даража, шимол ва чўл ҳудудларида эса 27–30 даража атрофида бўлиши кутилмоқда.

Ўзгидромет маълумотига кўра, июль ойидаги ўртача ҳарорат иқлимий меъёрдан 1,5–2 даражага юқори бўлади. Жанубда бу кўрсаткич 2–2,5 даражани, шимол ва чўл ҳудудларида эса 2,5–3 даражани ташкил этиши прогноз қилинмоқда.

Июль ойида республиканинг аксарият ҳудудларида асосан ёғингарчиликсиз об-ҳаво сақланади. Фақат айрим кунлари тоғ олди ва тоғли ҳудудларда қисқа муддатли ёмғир ёғиши ҳамда момақалдироқ кузатилиши мумкин. Ойлик ёғингарчилик миқдори эса меъёрдан кам бўлиши тахмин қилинмоқда.

Эслатиб ўтамиз, бугун, 29 июнь куни Тошкент шаҳрида кучли шамол кузатилаётгани сабабли чанг-тўзон кўтарилиши мумкинлиги ҳақида хабар берилган эди.