Италияда Россия фойдасига жосуслик қилганлар ҳибсга олинди

Бугун, 7 июль куни Италия ҳуқуқ-тартибот идоралари махфий маълумотларни Россия агентига етказганликда гумон қилинаётган икки кишини қўлга олди. Бу ҳақда “Reuters” хабар берди.

Қайд этилишича, асосий гумонланувчи 59 ёшли собиқ ҳарбий полиция ходими бўлиб, аввал Италия разведка тизимида фаолият юритган. У давлат сирларини ошкор қилиш, ҳимояланган маълумотларни ноқонуний узатиш ҳамда ахборот-коммуникация тизимларига рухсатсиз киришда айбланмоқда.

Тергов маълумотларига кўра, гумонланувчи Италия Қуролли кучларининг тўрт нафар ҳарбий хизматчисидан олинган махфий маълумотларни пул эвазига Россия агентига етказиб берган. Айбловларда тилга олинган россиялик шахс Италияда дипломатик дахлсизликка эга экани сабабли ҳибсга олинмаган.

Қайд этилишича, мазкур иш бўйича тергов 2025 йил май ойида бошланган. Ҳозирга қадар яна беш киши тергов доирасида текширилмоқда.

Воқеага муносабат билдирган Италия Мудофаа вазири Гвидо Кросетто ушбу тергов Россиянинг Италияга нисбатан олиб бораётган фаолиятини фош этганини таъкидлади.

“Бу гибрид уруш улкан айсбергнинг фақат кўзга кўриниб турган қисмидир. Унинг ортида пул, ҳокимият ёки шахсий манфаат эвазига ўз Ватанига хиёнат қилишга тайёр ички хоинлар ва ташқи душманлар турибди”, деб ёзди Кросетто Х ижтимоий тармоғидаги саҳифасида.

Эслатиб ўтамиз, аввалроқ Польша хавфсизлик хизмати Беларусь разведкаси фойдасига жосуслик қилганликда гумон қилинган икки шахсни қўлга олганди.