Иссиқ ҳаво туфайли Париж ва Лондон ўртасидаги темир йўл алоқаси узилди

Ғарбий Европада кузатилаётган аномал иссиқлик туфайли “Eurostar” компанияси Париж-Лондон йўналиши бўйича бир нечта поездлар қатнови бекор қилинганини эълон қилди. Бу ҳақда “Le Figaro” хабар берди.

Қайд этилишича, рельсларнинг деформацияланиши (шакли ўзгариши) ва ускуналарнинг қизиб кетишининг олдини олиш мақсадида тезликни чеклаш чоралари жорий этилмоқда. Йўловчилардан фақат ўта зарур бўлган ҳоллардагина сафарга чиқиш сўралган. Худди шундай чоралар Франциянинг SNCF темир йўл оператори томонидан ҳам кўрилмоқда – у ерда инфратузилмага етказадиган хавфлар туфайли ўнлаб “Intercites” поездлари бекор қилинган.

Францияда айни пайтда бутун мамлакат бўйлаб ҳаво ҳарорати ўртача кўрсаткичлардан 10 °C юқори бўлиб, кўплаб ҳудудларда +40 °C га етмоқда. Мамлакатнинг аксарият департаментларида максимал – хавфнинг “қизил” даражаси амал қилмоқда. Буюк Британияда ҳам “қизил” даражадаги хавф эълон қилинган.

“Meteo-France” маълумотларига кўра, 23 июнь куни Францияда 1947 йилдан бери энг иссиқ кун бўлди – бутун мамлакат бўйича ўртача ҳарорат +29,8 °C ни ташкил этди. Британиянинг “Met Office” метеорология хизмати эса Англия жанубида ҳаво ҳароратининг энг юқори нуқтаси +40 °C гача чиқишини прогноз қилмоқда.