Исроиллик дзюдочилар хавфсизлик сабаб Тошкентни тарк этди

Кеча, 1 март куни Исроил миллий дзюдо жамоаси хавфсизлик билан боғлиқ кўрсатма туфайли Тошкент шаҳрида бўлиб ўтаётган “Катта Дубулға” турниридаги иштирокини тўхтатди ва мамлакатни тарк этди. Бу ҳақда “The Jerusalim Post”  хабар берди.

Маълумотларга кўра, Исроилнинг Шин Бет хавфсизлик хизмати жамоага зудлик билан Ўзбекистонни тарк этиш бўйича кўрсатма берган. Қарор Эрон билан боғлиқ вазият жиддий тус олгандан сўнг қабул қилинган.

Делегация таркибида Олимпиада кумуш медали совриндори Раз Хершко ҳамда жамоанинг етакчи аъзоларидан бири Гили Шарир бор эди. Улар 2026 йилги мавсумнинг муҳим турнирларидан бири ҳисобланган “Катта Дубулға” мусобақасида иштирок этиш учун келган. Ушбу турнир спортчилар учун рейтинг очколари ва халқаро тажриба нуқтаи назаридан муҳим саналади.

Хавфсизлик кўрсатмасига биноан, жамоа аъзолари ва Исроил дзюдо ассоциацияси раиси Моше Понте мусобақани тарк этиб, Марказий Европага учиб кетган.

Қарор қабул қилинишидан олдин 11 нафар исроиллик дзюдочи баҳсларда қатнашган. Гили Шарир бронза медали учун курашга қадар етиб борган, бироқ ҳал қилувчи баҳсда франциялик Манон Декетерга мағлуб бўлган.

Турнирнинг сўнгги кунида татамига чиқиши режалаштирилган Раз Хершко эса хавфсизлик сабабли мусобақада иштирок этмаган.

Эслатиб ўтамиз, аввалроқ Тошкентда дзюдо бўйича “Катта Дубулға” турнирини ўз якунига етганди. Унда ўзбекистонлик умумжамоа ҳисобида 8 та медаль билан кучли учликдан жой олди.

АҚШ–Исроил–Эрон уруши

Кеча, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Исроил томонидан старт берилган операция “Еҳуда қалқони” деб номланган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига «иммунитет» олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.

Аввалроқ, Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.