Isroil tanklari G‘azoga yanada chuqur kirib bordi

Isroil tanklari kecha, 1 sentyabr kuni G‘azo shahriga yanada chuqur kirib bordi va shahar chetidagi bir mahallada mina o‘rnatilgan mashinalarni portlatdi. Havo hujumlari esa kamida 19 nafar odamni halok qildi. Bu haqda falastinlik rasmiylar va guvohlarga tayanib, “Reuters” xabar berdi.

Bu xabarlar dunyodagi yetakchi genotsid tadqiqotchilari uyushmasi Isroil G‘azoda genotsid sodir etayotganini belgilash uchun huquqiy mezonlar bajarilgani haqida qaror qabul qilingan bir paytga to‘g‘ri keldi. Isroil bu xabarlarga va yoki Xalqaro genotsid tadqiqotchilari uyushmasi bayonotiga hozircha javob bermadi. Isroil ilgari o‘z harakatlarini G‘azoda genotsid sifatida baholashni rad etgan.

Isroil butun G‘azo sektori ustidan nazorat o‘rnatish, HAMASni yo‘q qilish va qariyb ikki yillik urushdan so‘ng qolgan 48 nafar garovdagi isroillikni ozod qilish rejasi bilan olg‘a siljishda davom etmoqda. 

Shahar aholisi Isroil kuchlari eski zirhli mashinalarni aholi gavjum bo‘lgan Shayx Radvon mahallasiga yuborgani va keyin ularni masofadan portlatgani, bu esa bir nechta uylarni vayron qilib, ko‘proq oilalarning qochib chiqishiga olib kelganini xabar qildi.

Isroil armiyasi G‘azo shahri ustiga tashlangan varaqalar orqali aholini janubga ketishga chaqirdi va armiya hujumni g‘arbga tomon kengaytirish niyatida ekanini bildirdi.

“Odamlar chalkash holda – qolib o‘lish yoki yo‘q yo‘nalishga chiqib ketish orasida qoldi. Bu dahshatli tun edi, portlashlar to‘xtamadi, dronlar hech yo‘qolmadi. Ko‘p odamlar uylarini tashlab ketdi, chunki hayotlaridan qo‘rqdi, boshqalar esa qayerga borishni bilmasdi”, dedi Shayx Radvon mahallasidagi 55 yoshli aholi vakili Muhammad Abu Abdulla “Reuters”ga.

Isroil armiyasi bayonot chiqarib, kuchlar HAMAS bilan butun anklav bo‘ylab jang qilayotganini va o‘tgan bir kunda uning askarlariga hujum uyushtirish uchun ishlatilgan bir necha harbiy inshoot va postlar yo‘q qilinganini bildirdi.

G‘azo sog‘liqni saqlash vazirligi ma’lumot berishicha, oxirgi 24 soat ichida Isroil zarbasi oqibatida kamida 98 falastinlik halok bo‘lgan. Shuningdek, yana 9 kishi, jumladan 3 nafar bola, oxirgi bir kun ichida oziq-ovqat yetishmasligi va ochlikdan vafot etgan. Bunday sabablardan halok bo‘lganlar soni hozirga qadar kamida 348 nafarga yetdi, ular orasida 127 nafar bola bor.

Isroil esa G‘azoning HAMAS nazoratidagi hukumatining ochlikdan o‘lim haqidagi raqamlarini rad etadi va o‘limlar boshqa tibbiy sabablar bilan bog‘liq, deya iddao qiladi. Mahalliy sog‘liqni saqlash organlari ma’lumot berishicha, 19 nafar odam, ular orasida ayollar va bolalar ham bor, G‘azo shahridagi uylarga qilingan Isroil havo hujumlarida halok bo‘lgan. Isroil armiyasi bu xabarlarga hozircha munosabat bildirmadi.

Isroil Bosh vaziri Binyamin Netanyaxu 31 avgust kuni kechqurun xavfsizlik kengashini chaqirib, HAMASning asosiy o‘chog‘i deb ta’riflagan G‘azo shahrini bosib olish bo‘yicha yangi hujumni muhokama qildi. Isroil armiyasi siyosiy yetakchilarini ogohlantirib, rejalashtirilayotgan G‘azo shahri hujumi HAMAS qo‘lidagi garovdagilar hayotini xavf ostiga qo‘yishi mumkinligini aytdi. Isroilda esa urushni tugatish va garovdagilarni ozod qilish talabi bilan norozilik namoyishlari so‘nggi haftalarda kuchaydi.

Urush 2023 yil 7 oktyabrda HAMASning janubiy Isroilga hujumi bilan boshlangan. O‘shanda qariyb 1 200 kishi, asosan fuqarolar, halok bo‘lgan va 251 kishi garovga olingan. Hozirgi vaqtda qolgan 48 nafar garovdagi shaxsdan 20 nafari tirik deb hisoblanadi. G‘azo sog‘liqni saqlash rasmiylariga ko‘ra, Isroilning harbiy kampaniyasi hozirgacha 63 000 dan ziyod odamning, asosan fuqarolarning, umriga zomin bo‘lgan. Bu anklavni insonparvarlik inqiroziga yo‘liqtirgan va uning katta qismini vayron qilgan. Iyul oyida sulh muzokaralari natijasiz yakunlangan va ularni tiklash harakatlari hozirgacha muvaffaqiyatsiz bo‘ldi.